ایشین چیمپئن ٹرافی : کرکٹ کے بعد ہاکی میں بھی پاک بھارت مقابلہ توجہ کا مرکز

لاہور(سپورٹس رپورٹر)ایشین ہاکی فیڈریشن نے پاک، بھارت مقابلوں کو سب سے بڑا شائقین میلہ قرار دیدیا۔اے ایچ ایف کے چیف ایگزیکٹو آفیسر طیب اکرام کا کہنا ہے کہ گزشتہ برس بنگلا دیش کے دارالحکومت ڈھاکہ میں منعقد کئے گئے ایشیا کپ کے پاک بھارت مقابلے میں ایف آئی ایچ کے کسی بھی ایونٹ سے زیادہ تماشائی موجود تھے۔ اس مقابلے میں پرستاروں کا ریو اولمپکس ہاکی مقابلوں سے بھی زیادہ جوش و خروش تھا۔یاد رہے کہ پاکستان اور بھارت کی ٹیمیں آخری بار انڈونیشیا کے شہر جکارتہ میں ایشین گیمز کے دوران آمنے سامنے ہوئی ہوئی تھیں، اس میچ میں بلیو شرٹس نے گرین شرٹس کو 2-1 سے زیر کر کے کانسی کے تمغے سے بھی محروم کر دیا تھا۔ روایتی حریف اب ایک بار پھر 18اکتوبر سے اومان میں ہونے والی ایشین چیمپئن ٹرافی کے دوران آمنے سامنے ہوں گے، یہ مقابلہ 20 اکتوبر کو شیڈول ہے۔مزید معلوم ہوا ہے کہ ایشین چیمپئن ٹرافی کیلئے سلطان قابوس سپورٹس کمپلیکس میں نشستوں کی تعداد کو بھی بڑھا دیا گیا ہے، اب شائقین پہلے سے بھی زیادہ تعداد میں پاکستان اور بھارت کے درمیان میچ سے لطف اندوز ہو سکیں گے۔