آج روٹھے ہوئے ساجن کو بہت یاد کیا| ساغر صدیقی|

آج روٹھے ہوئے ساجن کو بہت یاد کیا
اپنے اُجڑے ہوئے گلشن کو بہت یاد کیا

جب کبھی گردشِِ تقدیر نے گھیرا ہے ہمیں
گیسوئے یار کی الجھن کو بہت یاد کیا

شمع کی جوت پہ جلتے ہوئے پروانوں نے
اک ترے شعلۂ دامن کو بہت یاد کیا

جس کے ماتھے پہ نئی صبح کا جھومر ہو گا
ہم نے اُس وقت کی دلہن کو بہت یاد کیا

آج ٹوٹے ہوئے سپنوں کی بہت یاد آئی ہے
آج بیتے ہوئے ساون کو بہت یاد کیا

ہم سرِ طور بھی مایوس تجلی ہی رہے
اس درِ یار کی چلمن کو بہت یاد کیا

مطمئن ہو ہی گئے دام و قفس میں ساغر
ہم اَسیروں نے نشیمن کو بہت یاد کیا

شاعر: ساغرصدیقی

(دیوانِ ساغر:سالِ اشاعت،1990)

Aaj    Roothay   Huay   Saajan   Ko   Bahut   Yaad   Kiya

Apnay   Ujrray   Huay   Gulshan  Ko  Bahut   Yaad   Kiya

Jab   Kabhi   Gardish-e- Taqdeer   Nay   Ghaira   Hay   Hamen

Gaisu-e-Yaar   Ki   Uljhan   Ko  Bahut   Yaad   Kiya

Shama    Ki   Jot   Pe   Jaltay   Huay   Parwaanon   Nay

Ik   Tiray   Shola -e-Daaman   Ko  Bahut   Yaad   Kiya

Jiss   K   Maathay   Pe   Nai   Subh   Ka   Jhoomar   Ho   Ga

Ham   Nay   Uss   Waqt   Ki   Dulhan   Ko  Bahut   Yaad   Kiya

Aaj   Tootay   Huay   Sapnon   Ki   Bahut   Yaad   Aai

Aaj   Beetay   Huay   Saawan   Ko   Bahut   Yaad   Kiya

Ham   Sar-e-Toot   Bhi   Mayoos-e-Tajalli   Hi   Rahay

Uss   Dar-e-Yaar   Ki   Chliman   Ko  Bahut   Yaad   Kiya

Mutmaain   Ho   Hi   Gaey   Daam-o- Qafass   Men  SAGHAR

Ham   Aseeron   Nay  Nashaiman   Ko  Bahut   Yaad   Kiya

Poet: Saghar   Siddiqui