پاک چین دوستی سبوتاژ کرنے کی ہر سازش ناکام بنانے کیلئے پر عزم ہیں:ایاز صادق
اسلام آباد (مانیٹرنگ ڈیسک) سپیکر قومی اسمبلی سردار ایاز صادق نے چینی سفارتخانے کا دورہ کیا، سپیکر نے چینی سفیر سے ملاقات کی۔سپیکر سردارایاز صادق نے شانگلہ بشام کے مقام پر دہشتگردانہ حملے میں چینی انجینئرز کی ہلاکتوں پر گہرے دکھ اور افسوس کا اظہار کیا، اورکہا جاں بحق چینی انجینئرز کے اہلخانہ کے غم اور دکھ میں برابر کے شریک ہیں، چین پاکستان کا باا عتماد دوست اور ہر مشکل وقت کا ساتھی ہے۔سردار ایاز صادق نے کہا پاکستان کی پارلیمان اور عوام دہشتگردی کے اس واقعہ میں جاں بحق چینی انجینئرز کے اہلخانہ سے مکمل یکجہتی کا اظہا ر کرتے ہیں، پاکستان کو چین کی سدا بہار دوستی پر فخر ہے، چینی باشندوں کو دہشتگردی کا نشانہ بنانا گھناؤنی سازش ہے۔ پاکستان کی پارلیمان، عوام اور سکیورٹی فورسز پاک چین دوستی کو سبوتاژ کرنے کی ہر سازش کو ناکام بنانے کیلئے پرعزم ہیں، پاکستان کی پارلیمان میں موجود تمام سیاسی جماعتیں چینی انجینئرز کی ہلاکتوں پر افسردہ ہیں۔سپیکر قومی اسمبلی نے کہا پاکستان کی تمام سیاسی جماعتیں مشکل وقت میں چین کی پارلیمنٹ، حکومت اور عوام کیساتھ مکمل یکجہتی کا اظہار کرتے ہیں، چینی انجینئرز پر حملہ ناقابل برداشت ہے۔
ایاز صادق