پانامہ لیکس کے غبارے سے ہوا لیک ہونا شروع ہو گئی ، حمزہ شہباز

پانامہ لیکس کے غبارے سے ہوا لیک ہونا شروع ہو گئی ، حمزہ شہباز

لا ہو ر (جنرل رپورٹر) مسلم لیگ (ن )کے مرکزی رہنما و ممبر قومی اسمبلی حمزہ شہباز نے کہا ہے کہ پانامہ لیکس کے غبارے سے ہوا لیک ہونا شروع ہو گئی ہے ،الزام لگانے والوں کے پاس حسب عادت کوئی ثبوت نہیں ،حمزہ شہباز نے کہا کہ میاں محمد نواز شریف کی قیادت میں عوام سے کئے ہوئے وعدے پورے کرنے جا رہے ہیں ہمارے پاس ضائع کرنے کے لئے وقت نہیں ۔لوگوں کی پگڑیاں اچھالنے اور بے بنیاد الزامات کی سیاست کرنے کی بجائے ملک کو ترقی و خوشحالی سے ہمکنار کر کے ملک کی تقدیر بدلتے ہوئے مضبوط جمہوری ادارے عوام کا مقدر بننے جا رہے ہیں ۔ گریٹر اقبال پارک میں 8ویں سالانہ گل داؤدی کی نمائش کا افتتاح کرنے کے بعد میڈیا سے گفتگو کرتے ہوئے حمزہ شہباز نے کہا کہ جمہوریت اور جمہوری روایات پر اعتماد کے علاوہ لوگوں کی توقعات کو پوری کرنا بھی ضروری ہوتا ہے ۔دھاندلی کا طوطی بجانے کی طرح پانامہ لیکس کے ثبوت بھی پیش نہیں کر سکیں گے۔انہوں نے کہا کہ نیک نیتی سر چڑھ کر بولتی ہے اور اب سیاسی جماعتوں کے لئے 2018 میں عوامی عدالت لگے گی جس میں کارکردگی کی بنیاد پر فیصلہ ہو گا ۔حمزہ شہباز نے کہا کہ عمران خان اپنے دائیں بائیں قرضہ معاف کرانے اور قبضہ گروپ یعنی جہانگیر ترین اور علیم خان کے علاوہ کے پی کے پر بھی غور کر لیں جہاں کے عوام ان کا شدت سے راستہ دیکھ رہے ہیں ۔ ایک سوال کے جواب میں حمزہ شہباز نے کہا کہ بلاول کو ان کے بیانات مبارک ہوں ہمیں میاں نواز شریف نے ایسی گفتگو کرنے کا درس نہیں دیا ہم سیاست میں شرافت ، رواداری اور باہمی احترام کے خواہاں ہیں ۔ انہوں نے کہا کہ پیپلز پارٹی اور مسلم لیگ (ن) نے ڈکٹیٹر شپ کا سامنا کیا ہے ۔ عوام حقائق بخوبی جانتے ہیں اور وہ ایسے بیانات کا نوٹس نہیں لیتے۔ حمزہ شہباز نے کہا کہ محترمہ بے نظیر بھٹو کی جمہوریت کے لئے خدمات ہیں ،سیاست میں ہر شخص غلط نہیں ہوتا مجھے انہی کے دور میں پہلی مرتبہ 6 ماہ جیل کاٹنا پڑی ۔ حمزہ شہباز نے کہا کہ جمہوریت ہم سب سے میچورٹی کا تقاضہ کرتی ہے اور انشا ء اللہ 46 ارب ڈالر کی سرمایہ کاری ، سی پیک کے منصوبے اور گوادر پورٹ کا فنکشنل ہونا عوام کے لئے بہت بڑی خوشخبری ہیں۔قبل ازیں حمزہ شہباز نے پی ایچ اے کے زیر اہتمام 100 اقسام پر مشتمل گل داؤدی کی نمائش کا افتتاح کیا اور مختلف پھولوں کے سٹال بھی دیکھے ۔انہوں نے کہا کہ گریٹر اقبال پارک اس علاقے اور شہر ہی نہیں پورے پاکستان کے لئے اپنی نوعیت آپ کا تحفہ ہے جہاں مینار پاکستان کے سائے تلے ملک بھر کے عوام یکجہتی کا پیغام دیتے ہیں ۔انہوں نے کہا کہ وزیر اعظم جلد ہی اس پارک کا باقاعدہ افتتاح کریں گے ۔حمزہ شہباز نے مہمانوں کی کتاب میں تاثرات بھی درج کئے ۔ پارک کے مختلف حصے دیکھے اور وہاں کئے گئے کام پر انتظامیہ کو شاباش دی ۔

حمزہ شہباز

مزید : صفحہ اول


loading...