الٰہ آباد میں جنوری اور مارچ کے درمیان شادیوں پر پابندی لگادی گئی
نئی دہلی(مانیٹرنگ ڈیسک) بھارتی ریاست اترپردیش کے شہر الہٰ آباد (اب انتہاء پسند ہندوؤں کے دباؤ پر جس کا نام تبدیل کرکے پریاگ راج رکھا جا چکا ہے) میں ہر سال کمبھ کا میلہ ہوتا ہے جو کئی ہفتے تک جاری رہتا ہے اور لاکھوں لوگ اس میں شرکت کرتے ہیں۔ رواں سال اترپردیش کے وزیراعلیٰ یوگی ادتیہ ناتھ نے میلے کے دنوں میں جنوری سے مارچ تک الہٰ آباد میں شادیوں اور دیگر اس نوع کی تقریبات پر پابندی عائد کر دی ہے۔ ٹائمز آف انڈیا کے مطابق حکومت کی طرف سے جاری کیے گئے حکمنامے میں کہا گیا ہے کہ ’’کمبھ کا میلا شروع ہونے سے ایک دن پہلے سے لے کر اختتام کے ایک دن بعد تک شہر میں کسی شادی کی اجازت نہیں ہو گی۔ ‘‘ یہ میلہ چونکہ 15جنوری کو شروع اور مارچ میں ختم ہو گا، چنانچہ اس حکمنامے کے تحت ان مہینوں میں الہٰ آباد میں کوئی شادی نہیں ہو سکے گی۔ شہر کی ضلعی انتظامیہ کی طرف سے حکمنامے کی کاپیاں شادی ہالز اور ہوٹلوں کے مالکان کو بھیج دی گئی ہیں اور انہیں حکم دیا گیا ہے کہ ان دنوں میں ان کے ہاں جس شادی کی بکنگ کی گئی ہے وہ اسے منسوخ کر دیں۔