بلاول کے والد نے بھی اپنے پاگل ہونے کا سرٹیفکیٹ پیش کیا تھا،ایم کیو ایم
لندن(این این آئی)متحدہ قومی موومنٹ (ایم کیوایم )کی رابطہ کمیٹی کے رکن محمد انور نے کہا ہے کہ سابق صدر پرویز مشرف کو بزدلی کا طعنہ دیتے وقت بلاول بھٹو زرداری یہ نہ بھولیں کہ ان کے والد نے بھی مقدمات سے بچنے کے لئے پاگل پن کے سرٹیفیکیٹ عدالت میں پیش کئے تھے۔لندن سے جاری اپنے بیان میں محمد انور کا کہنا تھا کہ پاکستان پیپلز پارٹی کے سرپرست اعلی بلاول بھٹو زرداری نے سابق صدرپرویز مشرف کو دل کادورہ پڑنے کی خبر پر جو تضحیک آمیز تبصرہ کیا ہے وہ بہت افسوسناک ہے، جس پر ہر ذی شعور پاکستانی کو شدید صدمہ پہنچا ہے۔ بلاول بھٹو زرداری کسی کے رویہ اور کردار پر کیچڑا چھالنے سے پہلے اور اپنے اہل خانہ کے کردار پر نظر ڈالیں تو یہ ان کے حق میں بہتر ہوگا۔انہوں نے کہاکہ پرویز مشرف کو بزدلی کا طعنہ دینے سے پہلے بلاول بھٹو زرداری یہ نہ بھولیں کہ ان کے والد اپنے خلاف مقدمات سے اس قدر خوف و ہراس کا شکارہوئے تھے کہ ان کے وکلا نے ان کی عدالت میں پیشی سے بچنے کےلئے سوئس عدالت میں پاگل پن کے سرٹیفکیٹس پیش کئے تھے۔
