کرکٹ ورلڈ کپ،بنگال ٹائیگرز نے جنوبی افریقہ کوشکست دیدی

کرکٹ ورلڈ کپ،بنگال ٹائیگرز نے جنوبی افریقہ کوشکست دیدی

  



لندن(مانیٹرنگ ڈیسک) کرکٹ ورلڈ کپ 2019 کے پانچویں میچ میں بنگلادیش نے جنوبی افریقا کو 21 رنز سے شکست دیدی۔بنگال ٹائیگرز کے 331 رنز کے ہدف میں جنوبی افریقا کی ٹیم مقررہ 50 اوورز میں 8 وکٹوں کے نقصان پر 309 رنز بناسکی۔لندن کے اوول گراؤنڈ میں کھیلے گئے میچ میں جنوبی افریقی کپتان فاف ڈوپلیسی نے ٹاس جیت کر پہلے بنگلادیش کو پہلے بیٹنگ کی دعوت دی۔بنگلا دیش کی جانب سے تمیم اقبال اور سومیہ سرکار نے اننگز کا آغاز کیا اور ابتداء میں دونوں بلے بازوں نے جارحانہ کھیل مظاہرہ کرتے ہوئے ٹیم کو 60 رنز کا آغاز فراہم کیا۔تمیم اقبال نے 16 رنز بنائے جبکہ سومیہ سرکار نے 42 رنز کی اننگز کھیلی۔ دو وکٹیں گرنے کے بعد شکیب الحسن اور مشفیق الرحیم نے پروٹیز بولرز کی ایک نہ چلنے دی اور دونوں کھلاڑیوں نے بالترتیب 75 اور 78 رنز کی اننگز کھیلیں۔محمد متھن نے 21 اور مصدق حسین نے 26 رنز کی اننگز کھیلی جبکہ محمد اللہ نے 46 رنز بنائے اور ناٹ آؤٹ رہے۔جنوبی افریقا کی جانب سے پھلکوایو، کرس مورس اور عمران طاہر نے دو دو کھلاڑیوں کو آؤٹ کیا۔بنگلا دیش کے 331 رنز کے ہدف میں جنوبی افریقا کی اننگز کا آغاز ڈی کوک اور ایڈن مارکرم نے کیا لیکن 49 کے مجموعی اسکور پر ڈی کوک 23 رنز بناکر رن آؤٹ ہوئے۔ پروٹیز کی دوسری وکٹ مارکرام کی گری جو کہ 45 رنز بناکر آؤٹ ہوئے، اس کے بعد کپتان فاف ڈوپلیسی بھی 62 رنز بناکر حسن مرزا کا شکار بنے۔ بنگلا دیش کی نپی تلی بولنگ کے باعث جنوبی افریقا کے بلے باز بڑے شاٹس اور پارٹنر شب بنانے میں ناکام رہے۔پروٹیز مقررہ 50 اوورز میں 8 وکٹوں کے نقصان پر 309 رنز بناسکے اور اسے 21 رنز سے شکست کا سامنا کرنا پڑا۔ جنوبی افریقا کی جانب سے فاف ڈوپلیسی 62، ایڈن مارکرام اور جے پی ڈومینی نے 45،45 رنز بناکر نمایاں رہے۔ بنگلادیش کے مستفیض الرحمان نے 3 اور محمد سیف الدین نے 2 کھلاڑیوں کو آؤٹ کیا۔

میچ

مزید : صفحہ اول


loading...