پی ٹی آئی کا مخصوص نشستوں سے متعلق الیکشن کمیشن کے فیصلے کو چیلنج کرنے کا اعلان
اسلام آباد(ڈیلی پاکستان آن لائن) پاکستان تحریک انصاف( پی ٹی آئی) نے الیکشن کمیشن کے پنجاب اسمبلی کی 5 مخصوص نشستوں سے متعلق فیصلے کو عدالت میں چیلنج کرنے کا اعلان کردیا ہے ۔
نجی ٹی وی "جیو نیوز"کے مطابق پاکستان تحریک انصاف کے رہنما فرخ حبیب کا کہنا ہے کہ الیکشن کمیشن کا فیصلہ آرٹیکل 224 (6) کے خلاف ہے،اس فیصلے کو عدالت میں چیلنج کیا جائے گا۔
فرخ حبیب نے کہا کہ مخصوص نشستوں پر پی ٹی آئی کی ترجیحاتی لسٹ پر نوٹیفکیشن ہونا چاہیے۔ہم الیکشن کمیشن پر پہلے ہی اپنے تحفظات کا اظہار کر چکے ہیں۔
واضح رہے کہ گزشتہ روز چیف الیکشن کمشنر کی زیر صدارت 5رکنی بینچ نے محفوظ فیصلہ سنایا، الیکشن کمیشن نے تحریک انصاف اور مسلم لیگ ن کے وکلا کے دلائل کے بعد فیصلہ محفوظ کیا تھا۔
الیکشن کمیشن نے پنجاب اسمبلی کی 5مخصوص نشستوں پر پی ٹی آئی کی جانب سے ارکان نوٹی فائی کرنےکی درخواست جبکہ پاکستان مسلم لیگ (ن )کی پارٹی نشستوں کے مطابق مخصوص نشستیں تقسیم کرنےکی درخواست مستردکر دی تھی ۔ الیکشن کمیشن نے پنجاب اسمبلی کی 5 مخصوص نشستوں سے متعلق فیصلہ سنایا کہ مخصوص نشستوں پر ضمنی الیکشن تک نوٹیفکیشن روک دیا گیا ہے، 5مخصوص نشستوں کا نوٹیفکیشن ضمنی الیکشن کےنتائج کے بعدجاری کیا جائےگا۔
خیال رہےکہ پنجاب اسمبلی کے25 منحرف اراکین اسمبلی کو الیکشن کمیشن نے ڈی نوٹیفائی کیا تھا، ان میں 5 مخصوص نشستوں کے اراکین بھی شامل تھے، جن میں 3 خواتین اور 2 اقلیتوں کی نشستیں شامل ہیں۔
