انضمام الحق 8 رنز فی اوور کی ایوریج کے لیے کہتے تھے فکر نہ کر ہم آرام سے بنا لیں گے، سابق بھارتی کھلاڑی نے تعریفوں کے پل باندھ دیئے
ممبئی(ڈیلی پاکستان آن لائن)بھارت کے سابق مایہ ناز اوپننگ بیٹر وریندر سہواگ نے پاکستان کے سابق کپتان انضمام الحق کو اپنے دور میں ایشیا ءکا سب سے بہترین مڈل آرڈر بیٹر قرار دیدیا۔سابق بھارتی بیٹر کا کہنا تھاانضمام الحق 04-2003 میں 8 رنز فی اوور کی ایوریج کے لیے کہتے تھے فکر نہ کر ہم آرام سے بنا لیں گے، 10 اوورز میں 80 رنز بنانے کے لیے دوسری ٹیمیں اور کھلاڑی گھبرا جاتے تھے لیکن انضمام الحق کہتے تھے بن جائیں گے فکر مت کرو۔
ایک انٹرویو دیتے ہوئے وریندر سہواگ کا پاکستان ٹیم کے سابق کپتان کی تعریف کرتے ہوئے کہنا تھا انضی بھائی بہت اچھے ہیں، سب لوگ سچن ٹنڈولکر کی بات کرتے ہیں لیکن میں انضمام الحق کو ایشیا ءکا سب سے بڑا مڈل آرڈر کا بلے باز مانتا ہوں۔ہم تو ٹنڈولکر کو بلے بازوں کی فہرست میں گنتے ہی نہیں کیونکہ وہ تو اس فہرست میں بہت اوپر ہیں، اب پاکستان، بھارت، سری لنکا اور دیگر ایشیئن ممالک میں مڈل آرڈر کے جتنے بھی بلے باز آتے ہیں ان میں انضمام الحق سے بہتر بلے باز کوئی نہیں ہے۔
