فوجی تنصیبات پر حملوں کا مقصد اپنے لیڈر کی کرپشن چھپانا تھا، عطا تارڑ
لاہور (ڈیلی پاکستان آن لائن) مسلم لیگ ن کے رہنما اور وزیر اعظم کے معاون خصوصی عطا تارڑ نے کہا ہے کہ 9 مئی کو فوجی تنصیبات پر حملے کا مقصد اپنے لیڈر کی کرپشن چھپانا تھا ۔
لاہور میں پریس کانفرنس کرتے ہوئے عطا تارڑ نے کہا کہ لندن سے پاکستان کو 190 ملین پاؤنڈ کی رقم آئی تھی، یہ رقم قومی خزانے میں جمع ہونی تھی لیکن بند لفافے کی کابینہ سے منظوری کے بعد یہ رقم سپریم کورٹ میں جمع کروادی گئی، اس مجرمانہ فعل کو چھپانے کے لیے 9 مئی کو شہداء کی یادگاروں پر حملے کیے گئے ۔ انہوں نے کہا کہ عمران خان کی گرفتاری کے بعد ہونیوالی توڑ پھوڑ میں ملوث کسی شخص کو معاف نہیں کیا جائے گا، تحریک انصاف کی جو خواتین جیلوں میں قید ہیں ان کے خلاف واضح ثبوت موجود ہیں، جیلوں میں تمام افراد کے ساتھ قانون کے مطابق سلوک کیا جارہا ہے۔
انہوں نے کہا کہ شہزاد اکبر کو ایک نہ ایک دن اپنے گناہوں کا حساب دینا ہوگا، شہزاد اکبر وطن واپس آئیں اوراپنے بھائی کی دیکھ بھال کریں۔
