کراچی :رہائشی عمارت میں پانی کے ٹینک میں دھماکا ، ایک زخمی
کراچی(کرائم رپورٹر)کراچی میں عبداللہ شاہ غازی کے مزار کے قریب رہائشی عمارت میں پانی کے ٹینک میں گیس جمع ہونے سے زور دار دھماکے سے پھٹ گیا ، واقعے میں ایک شخص زخمی ہوگیا ، متعدد گاڑیوں کو شدید نقصان پہنچا ۔ تفصیلات کے مطابق کراچی میں عبداللہ شاہ غازی کے مزار کے قریب ایک عمارت میں پانی کے ٹینک میں اچانک زور دار دھماکا ہوا ۔ دھماکے سے بلڈنگ اور قریبی علاقے میں شدید خوف و ہراس پھیل گیا ۔ پانی کا ٹینک پارکنگ ایریا میں ہونے کی وجہ سے متعدد گاڑیاں اور ایک موٹر سائیکل کو شدید نقصان پہنچا ۔ دھماکے کے فوری بعد پولیس کی بھاری نفری موقع پر پہنچ گئی ، بم ڈسپوزل سکواڈ کے عملے نے موقع پر پہنچ کر شواہد جمع کئے ۔ بم ڈسپوزل سکواڈ کے ٹیکنیکل انچارج کے مطابق دھماکا پانی کے ٹینک میں گیسز کے جمع ہونے سے ہوا ۔ ٹینک کے قریب چوکیدار نے ماچس جلائی جس سے دھماکا ہوا ۔ بلڈنگ کے رہائشیوں نے واقعہ کی مکمل تحقیقات کا مطالبہ کیا ہے ۔ دھماکے میں زخمی ہونے والے چوکیدار کو ہسپتال منتقل کر دیا گیا ہے ۔ پولیس کے مطابق واقعے کی مزید تحقیقات کی جائیں گی ۔
