ماتحت عدالتوں میں 73305 مقدمات زیر التواء ہیں،ضیاء لنجار
کراچی (اسٹاف رپورٹر )سندھ کی ضلعی اور دیگر ماتحت عدالتوں میں 73305 مقدمات زیر التواء ہیں ۔ یہ بات سندھ کے وزیر قانون و پارلیمانی امور ضیاء الحسن لنجار نے جمعرات کو سندھ اسمبلی میں محکمہ قانون و پارلیمانی امور سے متعلق وقفہ سوالات کے دوران بتائی ۔ وزیر قانون نے بتایا کہ 17 پراسیکیوٹرز کو گریڈ 19 میں ڈسٹرکٹ پبلک پراسیکیوٹرز کا عارضی طور پر چارج دیا گیا ہے ۔ محکمہ قانون میں کوئی افسر او پی ایس میں نہیں ہے ۔ اگر کوئی گریڈ 19 کا افسر دستیاب نہ ہو تو اس سے نچلے گریڈ کے سینئر ترین افسروں کو گریڈ 19 میں رکھا جاتا ہے ۔ 17 میں سے 9 افسران اپنی ترقی کی مدت پوری کر چکے ہیں ۔ انہوں نے بتایا کہ صوبے کے کل 27 جوڈیشل ڈسٹرکٹ ہیں ، جن میں مجموعی طور پر 617 ڈسٹرکٹ اور سول کورٹس ہیں ۔کچھ عرصہ قبل ان عدالتوں میں 548 ججز کام کر رہے تھے جبکہ 69 ججز کی اسامیاں خالی تھیں ۔ اب نہ صرف یہ اسامیاں پر کر دی گئی ہیں بلکہ 58 نئی اسامیاں بھی تخلیق کرکے پر کر دی گئی ہیں ۔ وزیر قانون نے بتایا کہ صوبے کی ماتحت عدالتوں میں 73305 مقدمات زیر التواء ہیں ۔ ان میں سے 60967 مقدمات ضلعی عدالتوں میں ، 2385 اینٹی کرپشن کورٹس میں ، 5219 مقدمات انسداد ہشت گردی کی عدالتوں میں ، 255 مقدمات احتساب عدالتوں میں ، 452 مقدمات کسٹم اور اینٹی اسمگلنگ کورٹس میں ، 244 مقدمات بینکوں کی خصوصی عدالتوں میں ، 70 مقدمات ڈرگ کورٹس ، 3648 مقدمات سی این ایس کورٹس میں اور 66 مقدمات اینٹی انکروچمنٹ کورٹس میں زیر التواء ہیں ۔ وزیر قانون نے بتایا کہ یکم جنوری 2008 سے 15 مارچ 2013 تک محکمہ قانون و پارلیمانی امور میں شہری کوٹہ پر 338 اسامیاں پر کی گئیں ۔ ان میں سے کریمنل پراسکیوشن سروس ونگ میں 66 ، ایڈووکیٹ جنرل سندھ کے آفس میں 44 ، سولسٹر ڈپارٹمنٹ میں 183 اور نظامت انسانی حقوق میں 45 اسامیوں پر ملازمتیں فراہم کی گئیں ۔