بھارتی رائٹر کی جانب سے’’میرے پاس تم ہو‘‘کی کہانی چرانے کا دعویٰ
لاہور(فلم رپورٹر)بھارتی رائٹر شگفتہ رفیق کی جانب سے پاکستانی ڈرامہ ’میرے پاس تم ہو‘ کی کہانی چرانے کے دعوے پر ہمایوں سعید نے انہیں جواب دیا ہے۔ ڈرامہ ’میرے پاس تم ہو‘ اپنی بہترین کہانی اور کرداروں کی بہترین اداکاری کی وجہ سے موضوعِ بحث ہے۔ ڈرامہ کی مقبولیت نے نہ صرف پاکستان بلکہ بھارت میں بھی تہلکہ مچا رکھا ہے یہاں تک کہ بھارتی رائٹر کی جانب سے اس ڈرامے کی کہانی کو اپنا بتانے کا جھوٹا دعویٰ بھی سامنے آگیا ہے۔بھارتی فلم ’عاشقی ٹو‘ کی مصنفہ شگفتہ رفیق کی جانب سے دعویٰ کیا گیا ہے کہ ڈرامہ ’میرے پاس تم‘ کی کہانی ہمایوں سعید کو کچھ سال قبل سنائی تھی جس کے بعد اداکار نے اسے اپنی کہانی بنا کر ڈرامہ بنا دیا۔بھارتی مصنف کی جانب سے کیے جانے والے جھوٹے دعوے پر ہمایوں سعید نے ایک انٹرویو میں تردید کرتے ہوئے کہا کہ شگفتہ رفیق میری بہت اچھی دوست ہیں لیکن اْن کا جو دعویٰ ہے اس میں کسی قسم کی کوئی صداقت نہیں، کیوں کہ حقیقت تو یہ ہے کہ خلیل الرحمٰن قمر کا لکھا ہوا یہ سکرپٹ اداکار و پروڈیوسر حسن سومرو سے خریدا تھا کیوں کہ وہ پروڈکشن چھوڑ کر بیرون ملک جا رہے تھے۔ہمایوں سعید نے یہ بھی کہا کہ میں نے جب یہ سکرپٹ پڑھا تو بہت پسند آیا اور اس حوالے سے خلیل الرحمن قمر کو بھی کہا کہ شاید آپ صرف مجھے ہی اچھے اسکرپٹ دیتے ہیں لیکن آپ نے تو حسن سومرو کو بھی اچھے سکرپٹ دیئے ہیں اور آج مجھے فخر ہے کہ میں نے یہ اسکرپٹ حسن سومرو سے خرید لیا تھا۔