جدید ٹیکنالوجی والی فلموں کو رسپانس مل رہا ہے، عائشہ صنم

لاہور(فلم رپورٹر) معروف اداکارہ و ماڈل عائشہ صنم خان نے کہا ہے کہ اس وقت ایسے اسٹارز کی اشد ضرورت ہے، جن کانام سنتے ہی شائقین سینماگھروں کا رخ کرنے کو بے تاب ہونے لگیں۔انہوں نے کہا ہے کہ اس وقت دیکھا جائے توپاکستانی فلم کوجہاں اچھی کہانی اورمیوزک کی ضرورت ہے، اس کے ساتھ ساتھ ایسے سٹارز کی بھی اشد ضرورت ہے، جن کانام سنتے ہی شائقین سینماگھروں کا رخ کرنے کو بے تاب ہونے لگیں۔ اس کی عمدہ مثال بالی وڈ کنگ شاہ رخ، سلمان اورعامر خان کے نام فلموں میں شامل ہوتے ہی سامنے آجاتی ہے۔ ان فنکاروں کی فلمیں ہٹ ہوں یا فلاپ، مگرشائقین ایک بارتوسینما گھرضرورجاتے ہیں۔ اس لئے ضروری ہے کہ ہمارے فنکاربھی ایسا کام کریں جوان کو پاکستانی فلم کا سپراسٹار بنانے میں مددگار ثابت ہوں۔ایک سوال کے جواب میں انہوں نے کہا ہے کہ پاکستان فلم انڈسٹری نے ایک نئے دورمیں قدم رکھ دیا ہے۔ اس سفرمیں ویسے توٹی وی سے وابستہ فنکاروں کی خدمات حاصل کی جا رہی ہیں لیکن اس دوران ایک سوال جوباربارذہن میں آتا ہے کہ کیا موجودہ دورمیں بننے والی فلم کے فنکار ، نوجوان نسل کے آئیڈیل بن پائیں گے۔عائشہ صنم خان نے کہا کہ ان ستاروں نے بلاشبہ ٹی وی سیریلز میں اپنی عمدہ اداکاری سے ناصرف پاکستان بلکہ ہمارے پڑوسی ملک کے باسیوں کوبھی اپنا دیوانہ بنا رکھا ہے۔
مگرسوچ طلب بات یہ ہے کہ گزشتہ چند برسوں کے دوران پاکستان میں جدید ٹیکنالوجی سے سجنے اور سنورنے والی فلموں کو وہ رسپانس مل رہا ہے، جس کی ہم توقع کرتے ہیں یا جوخبریں سوشل میڈیا کے ذریعے پھیلائی جارہی ہیں۔