شہریار تاثیر کیخلاف جعلسازی سے جائیداد ہتھیانے پرمقدمہ درج
کراچی ( مانیٹرنگ ڈیسک)سابق گورنر پنجاب سلمان تاثیر کے بیٹے شہریارتاثیر نے مبینہ طور پراپنی بہن سارا تاثیر کے جعلی دستخط سے ڈیلی ٹائمز اخبار،والدکے نام پر جائیداد اور دیگر اثاثے اپنے نام منتقل کردئیے۔ ہمشیرہ نے بھائی شہریار تاثیر کیخلاف تھانہ میں درخواست دی ہے ۔درخواست گزار سارا تاثیر کے مطابق والد سلمان تاثیر متعدد جائیداد کے مالک ان میں ڈیلی ٹائمز کا پرنٹنگ پریس اور مالکان حقوق بھی شامل ہیں ۔ سوتیلے بھائی شہریار تاثیر اور سوتیلی ماں آمنہ تاثیر نے ساتھیوں کی ملی بھگت سے میرے اورمیری بہنوں کے جعلی دستخط کے ذریعے بوگس دستاویزات تیار کیں اور انہیں متعلقہ حکومتی اداروں میں جمع کروادیا۔ان جعلی دستاویزات کو سیف اللہ خان اوتھ کمشنر لاہور نے ہماری غیر موجودگی میں تصدیق بھی کر ڈالا ۔ غیر قانونی ذریعے سے شہریار تاثیر اور آمنہ تاثیر نے ڈیلی ٹائمز کا ڈیکلریشن اور مالکانہ حقوق اپنے نام منتقل کروا لئے۔نوٹس میں لائے جانے پر کمشنر کراچی کو اس حوالے سے درخواست دی گئی اور ایف آئی آر بھی درج کرائی، سارا تاثیر نے ایف آئی آر میں حکومتی اداروں سے انصاف دینے کی اپیل بھی کی ہے۔میڈیا رپورٹس کے مطابق شہریار تاثیر اور ان کی والدہ آمنہ تاثیر نے مبینہ طور پر دو اشاعتی اداروں آج کل اور ڈیلی ٹائمز کے ڈیکلریشن شہریار تاثیر کے نام منتقل کرنے کے لئے 2اسٹام پیپر ز پر شان تاثیر ، صنم تاثیر اور سارہ تاثیر کے عدم اعتراض پر مبنی جعلی اقرار نامے تحریر کروائے جبکہ شہباز اور شہربانو تاثیر کے بھی جعلی دستخط کئے گئے۔دوسری جانب شان تاثیر کا کہنا تھا کہ جعل سازی کا علم ہونے پر آرام باغ پولیس سٹیشن کراچی میں کارروائی کے لئے درخواست دے دی گئی ہے۔ اس حوالے سے سماجی رابطوں کی ویب سائٹ ٹوئٹر پر ٹوئٹ کرتے ہوئے ان تمام خبروں کی تصدیق کردی ہے۔
