اپوزیشن لیڈر خورشید شاہ ہی رہیں گے ، تبدیلی کے خواہشمند اپنا شاق پورا کرلیں ،زرداری
اسلام آباد(صباح نیوز)پاکستان پیپلزپارٹی پارلیمنٹیرین کے سربراہ وسابق صدرِ پاکستان آصف علی زرداری نے کہا ہے کہ تبدیلی کے خوا ہشمند اپنا شوق پورا کر لیں،اپوزیشن لیڈر شپ خورشید شاہ کے پاس ہی رہے گی، یہ وقت اپوزیشن لیڈر کی تبدیلی کا نہیں بلکہ الیکشن ریفارمز اور انتخابات کی تیاری کا ہے، پی ٹی آئی اور ایم کیو ایم کے ارکان بھی اس تبدیلی کے حق میں نہیں کیونکہ ہمیں باقی اپوزیشن جماعتوں کی حمایت بھی حاصل ہے۔ان خیالات کا اظہار انہوں نے پاکستان پیپلزپارٹی آزاد کشمیر کے سیکرٹری جنرل فیصل ممتاز راٹھور سے گفتگو کرتے ہوئے کیا،آصف زرداری نے کہا کہ عمران خان کی اچھل کود کی غیر سنجیدہ سیاست نے اپوزیشن کے کردار کو کمزور اور مسلم لیگ(ن) کی حکومت کو واک اوور دیا ہے۔انہوں نے کہا کہ پیپلزپارٹی کو بھارت کی طرف سے مقبوضہ کشمیر میں انسانی حقوق کی سنگین خلاف ورزیوں پر تشویش ہے کیونکہ بھارت ریاستی دہشت گردی کے ذریعے کشمیریوں پر ظلم کے پہاڑ توڑ رہا ہے جس کاعالمی برداری کو نوٹس لینا چاہیے۔انہوں نے کہا کہ مسئلہ کشمیر کا واحد حل حق خود ارادیت ہے اور پاکستان پیپلزپارٹی کشمیریوں کی اخلاقی حمایت جاری رکھے گی جبکہ نواز لیگ کی حکومت نے مسئلہ کشمیر پر سرد مہری کا شکار ہے۔ آصف علی زرداری نے کہا کہ نواز لیگ کی غلط پالیسیوں کی وجہ سے ملک پر ورز بروزقرضے بڑھ رہے ہیں لیکن عام آدمی کو کوئی ریلیف نہیں مل رہا ہے۔ اس موقع پر انہوں نے فیصل ممتاز راٹھور کو آزاد کشمیر میں پارٹی کو دوبارہ منظم و فعال کرنے کی ہدایت کی ۔
