جے آئی یوتھ انٹرا پارٹی الیکشن کا تیسرا مرحلہ 29 اکتوبر کو ہوگا،عارف شیرازی
راولپنڈی (جنرل رپورٹر)امیر جماعت اسلامی سٹی ڈسٹرکٹ راولپنڈی سید عارف شیرازی نے کہا ہے کہ جے آئی یوتھ انٹرا پارٹی الیکشن کا تیسرا مرحلہ 29 اکتوبر کو ہوگا۔الیکشن کے سلسلے میں تیاریاں شروع کردی گئی ہیں ۔جماعت اسلامی یوتھ کو قیادت کے منصب پر لے کر آنا چاہتی ہے ۔ ان خیالات کا اظہار انہوں نے گزشتہ روز سید مودودی ؒ بلڈنگ میں جے آئی یوتھ انٹرا پارٹی کے تیسرے مرحلے کے الیکشن کے جائزہ اجلاس سے خطاب کرتے ہوئے کیا۔ اس اجلاس میں جماعت اسلامی راولپنڈی شہر اور کینٹ کے زونل اور یو سی اُمراء اور جے آئی یوتھ کے عہدیداران نے شرکت کی ۔اس موقع پر جے آئی یوتھ کے تیسرے مرحلے کے انتخابات کی تیاریوں اور انتظامات کا تفصیلی جائزہ لیا گیا۔ زونل اور یوسی اُمراء کے علاوہ جے آئی یوتھ کے عہدیداران نے بھی اپنے اپنے علاقوں میں اب تک کی تیاریوں کی رپورٹس پیش کیں ۔ سیدعارف شیرازی نے کہا ہے کہ نوجوان پاکستان کی آبادی کا ساٹھ فیصد ہیں ۔ ٹیلنٹ کی کوئی کمی نہیں ہے ۔نوجوانوں کی سرپرستی اور ان کو مثبت سرگرمیوں کے مواقع میسر کرنا وقت کی ضرورت ہے ۔ انہوں نے کہا کہ امیر جماعت اسلامی پاکستان سراج الحق کے وژن اور مرکزی مجلس شوریٰ کے فیصلے کے مطابق جماعت اسلامی پورے ملک میں نوجوانوں کو جے آئی یوتھ کے پلیٹ فارم پر اکٹھا کر رہی ہے ۔ اس سے قبل صوبہ پنجاب میں جے آئی یوتھ کے انٹرا پارٹی الیکشن کے دو مرحلے خوش اسلوبی سے مکمل ہوئے ہیں ۔ انہوں نے کہا کہ جے آئی یوتھ انٹرا پارٹی الیکشن ضلعی ٗزونل اور یونین کونسل کے اُمراء کی مکمل سرپرستی اورتعاون سے ہو رہے ہیں ۔ہم آنے والے نوجوانوں کو خوش آمدید کہتے ہیں ۔ سید عارف شیرازی نے کہا کہ اب تیسرے مرحلے کے انتخابات ان شا اللہ 29 اکتوبر کو منعقد ہوں گے ۔ الحمد للہ ! نوجوان بڑی تعداد میں جے آئی یوتھ میں شامل ہو رہے ہیں ۔ یہی نوجوان مستقبل میں جماعت اسلامی کے دست و بازو بنیں گے ۔
