سینٹرل پنجاب نے ڈی ایل ایس قانون کے تحت سندھ کو 12 رنز سے شکست دیدی
راولپنڈی(ڈیلی پاکستان آن لائن)ہوم سٹی سینٹرل پنجاب نے ڈی ایل ایس میتھڈ کے تحت جی ایف ایس سندھ کو 12 رنز سے شکست دیدی،تجربہ کار بیٹر شعیب ملک کو 47 گیندوں پر 8 چوکوں اور 5 چھکوں کی بدولت 85 رنز کی ناقابل شکست اننگز کھیلنے پر پلیئر آف دی میچ قرار دیا گیا،سینٹرل پنجاب کی یہ نیشنل ٹی ٹونٹی میں سندھ کے خلاف پہلی کامیابی ہے، اس سے قبل دونوں ٹیمیں تین مرتبہ مدمقابل آئیں تاہم تینوں مرتبہ فتح کی دیوی سندھ پر مہربان رہی تھی۔
تفصیلات کے مطابق 169 رنز کے تعاقب میں سندھ نے 14.4 اوورز میں 6 وکٹوں کے نقصان پر 110 رنز بنائے تھے کہ تیز بارش کے باعث میچ روک دیا گیا۔اس موقع پر ڈی ایل ایس پار اسکور 122 تھا۔شرجیل خان 36 رنز بناکر سندھ کے ٹاپ اسکورر رہے۔ انہیں سپنر قاسم اکرم نے آؤٹ کیا۔ نوجوان سپنر نے 4 اوورز میں 20 رنز دے کر تین وکٹیں حاصل کیں۔شرجیل خان نےابتدائی دو وکٹوں کے لیے خرم منظور اور شان مسعود کے ہمراہ بالترتیب 48 اور 28 رنز کی شراکت قائم کی تاہم ان کے بعد سندھ کا نیا آنے والا کوئی بھی بیٹر لمبی شراکت قائم کرنے میں کامیاب نہ ہوسکا۔خرم منظور 14، شان مسعود 12، سرفراز احمد 7، محمد طحہٰ 8 اور انور علی 4 رنز بناکر آؤٹ ہوئے،سعود شکیل 14 رنز پر ناٹ آؤٹ تھے کہ بارش کے باعث میچ روک دیا گیا۔ثمین گل نے 15 رنز دے کر 2 اور وہاب ریاض نے ایک کھلاڑی کو آؤٹ کیا۔
اس سےقبل سینٹرل پنجاب نےٹاس جیت کرپہلےبیٹنگ کا فیصلہ کیا تو کپتان بابراعظم سمیت اس کی ابتدائی دو وکٹیں محض 29 کے مجموعی سکور پر اس وقت گریں جب بابراعظم 12 اور محمد اخلاق 7 رنز بناکر آؤٹ ہوئے۔ایسے میں سینٹرل پنجاب کی کمان ٹی ٹونٹی سپیشلسٹ شعیب ملک نے سنبھال لی۔ انہوں نے ذمہ دارانہ بیٹنگ کرتے ہوئے پہلے تو اوپنر احمد شہزاد کے ہمراہ تیسری وکٹ کے لیے 42 رنز کی شراکت قائم کرکے اپنی ٹیم کو سنبھالا دیا۔ادھر احمد شہزاد تین چوکوں اور ایک چھکے کی مدد سے 35 رنز بناکر سپنر ابرار احمد کی گیند پر سٹمپ آؤٹ ہوئے تو سینٹرل پنجاب کا مڈل آرڈر مکمل طور پر فلاپ ہوگیا تاہم دوسرے اینڈ سے شعیب ملک نے تن تنہا سندھ کے باؤلرز پر چڑھائی جاری رکھی اور بالآخر سینٹرل پنجاب کو سکور بورڈ پر ایک بڑا مجموعہ سجانے میں مدد کی۔
تجربہ کار بیٹر نے میچ کے آخری تین اوورز میں وکٹ کے چاروں اطراف چھکوں اور چوکوں کی بارش کردی۔ انہوں نے 47 گیندوں پر 85 رنز کی ناقابل شکست اننگز کھیلی۔ سینٹرل پنجاب نے مقررہ بیس اوورز میں 8 وکٹوں کے نقصان پر 168 رنز بنائے۔اس دوران شعیب ملک کو دوسرے اینڈ سے کوئی سپورٹ نہ ملی۔ قاسم اکرم 8، حسین طلعت ایک، حسن علی 12، وہاب ریاض تین اور احسان عادل بغیر کوئی رن بنائے آؤٹ ہوئے۔سندھ کے رومان رئیس نے 33 رنز کے عوض چار جبکہ ابرار احمد نے 39 رنز دے کر تین کھلاڑیوں کو آؤٹ کیا۔