کراچی میں کالعدم تنظیم کا دہشتگرد ہلاک، 7 ملزم پکڑے گئے، اسلحہ اور دیگر سامان برآمد

کراچی(مانیٹرنگ ڈیسک ) شہر قائد میں قانون نافذ کرنے والے اداروں کی کارروائیاں جاری ہیں ۔ ماڑی پور میں کالعدم تنظیم کا دہشتگرد مارا گیا، لیاری سے گینگ وار کے تین ملزم پکڑے گئے جبکہ نیو کراچی اور درخشاں سے 4 افراد کو گرفتار کرلیا گیا۔تفصیلات کے مطابق سی ٹی ڈی نے ماڑی پور میں کالعدم تنظیم کے دہشتگردوں کی موجودگی کی اطلاع پر ٹارگٹڈ کارروائی کی، اس دوران ایک دہشتگرد زخمی ہوگیا جو اسپتال لے جاتے ہوئے راستے میں دم توڑ گیا، دہشتگرد کی شناخت عبدالرحمان عرف مفتی کے نام سے ہوئی ہے اور اس کا تعلق کالعدم جند اللہ سے ہے۔

یہ بھی پڑھیں :مرادن خودکش حملے کا مقدمہ نامعلو م دہشتگردوں کیخلاف درج کر لیا گیا

دوسری جانب لیاری کے علاقے میں قانون نافذ کرنے والے اداروں نے کارروائی کے دوران گینگ وار کے 3 ملزم گرفتار کر لئے، ذرائع کے مطابق گرفتار ملزموں کا تعلق عزیر بلوچ گروپ سے ہے۔ادھر نیوکراچی میں پولیس نے کارروائی کرتے ہوئے 2 ملزموں کو گرفتار کرلیا، پولیس کے مطابق ملزم محمود اسٹریٹ کرائم میں ملوث ہے جبکہ فیصل کو نیشنل ایکشن پلان کے تحت گرفتار کیا گیا، ملزمان کے قبضے سے اسلحہ اور موبائل فونز برآمد ہوئے ہیں۔