”میں پاکستان آنے کیلئے مزید انتظار نہیں کر سکتا“ معروف انگلش کرکٹر نے پی ایس ایل کے بقیہ میچز کھیلنے کیلئے پاکستان آنے کا اعلان کر دیا
لندن (ڈیلی پاکستان آن لائن) انگلینڈ کرکٹ ٹیم کے جارح مزاج بلے باز ایلکس ہیلز نے پاکستان سپر لیگ (پی ایس ایل)سیزن فائیو کے بقیہ میچز میں شرکت کیلئے پاکستان آنے کا اعلان کر دیا ہے۔
تفصیلات کے مطابق سوشل میڈیا ویب سائٹ ٹویٹر پر جاری اپنے پیغام میں ایلکس ہیلز نے لکھا کہ ”پاکستان جانے کیلئے مزید انتظار نہیں کرسکتا، جلد آپ لوگوں سے ملاقات ہوگی“۔
Can’t wait to get back to Pakistan! See you all soon ???????? ????????
— Alex Hales (@AlexHales1) September 3, 2020
واضح رہے کہ عالمگیر موذی وباءکورونا وائرس کے باعث پی ایس ایل فائیو کے بقیہ میچز 17 مارچ کو ملتوی کردئیے گئے تھے جن کے دوبارہ انعقاد کا شیڈیول جاری کردیا گیا ہے جس کے مطابق چاروں بقیہ میچز 14، 15اور 17 نومبرکو لاہور میں کھیلے جائیں گے۔ 14 نومبر کو ایونٹ کا کوالیفائر اور ایلمنٹر ون، ڈبل ہیڈر کی بنیاد پر کھیلے جائیں گے جبکہ اس کے اگلے روز ایلمنٹر ٹو اور فائنل17 نومبر بروز منگل کو ہوگا۔
یہ تمام میچز کورونا وائرس پروٹوکولز کے تحت کھیلے جائیں جہاں تمام کھلاڑی، میچ آفیشلز اور متعلقہ سٹاف بائیو سیکیور ماحول میں رہے گا۔فی الحال چاروں میچز بند دروازوں میں کھیلے جانے کا پلان ہے تاہم اس حوالے سے حتمی فیصلہ اکتوبر میں ہوگا۔ پاکستان کرکٹ بورڈ کے چیف ایگزیکٹو وسیم خان کا کہنا ہے کہ اس اعلان کے بعد نہ صرف تمام قیاس آرائیاں دم توڑ جائیں گی بلکہ اب ان میچوں کی تیاری کیلئے تمام ٹیموں کے پاس بھی مناسب وقت موجود ہے۔