اولڈ مینجمنٹ سسٹم کو سیاسی مداخلت نے خراب کردیا، قائم مقام چیف جسٹس عمر عطا بندیال
اسلام آباد(ڈیلی پاکستان آن لائن )سپریم کورٹ نے ریلوے گالف کلب لیز کے ٹینڈر جاری نہ ہونے پر اظہار برہمی کرتے ہوئے آڈیٹر جنرل کو اولڈ گالف کلب کا آڈٹ کرنے کا حکم دے دیا۔ سماعت کے دوران قائم مقام چیف جسٹس عمر عطا بندیال نے ریمارکس دیئے کہ اولڈ مینجمنٹ سسٹم کو سیاسی مداخلت نے خراب کردیاہے ،صرف ریلوے نہیں ہر شعبہ میں شفافیت اور ایمانداری کو یقینی بنائیں۔
نجی ٹی وی سما نیوز کے مطابق عدالت عظمیٰ میں قائم مقام چیف جسٹس عمر عطا بندیال کی سربراہی میں تین رکنی بینچ نے ریلوے گالف کلب سے متعلق کیس کی سماعت کی۔ عدالت نے نجی آڈٹ کمپنی کو بھی کلب کا آڈٹ جلد مکمل کرنے کی ہدایت کی۔
سماعت کے دوران جسٹس اعجاز الحسن نے ریماکس دیئے کہ ڈھائی سال سے کلب لیز کے ٹینڈر جاری نہ ہوسکے،ریلوے کو ٹینڈر جاری کرنے کے لئے مزید کتنا عرصہ چاہئے؟، وزیر ریلوے نے سیکرٹری ریلوے کو بائی پاس کرکے مشیر کو تعینات کیا جبکہ مشیر نے عہدہ سنبھالنے کے بعد لوٹ مار مچا دی اور کلب کی اعزازی ممبر شپ دینا شروع کردی، ملازمین کو نوکریوں نکال کر نئے لوگ بھرتی کئے گئے۔بریف کیس لے کر گھومنے والے عالمی سرمایہ کار کدھر گئے؟۔
قائم مقام چیف جسٹس عمر عطا بندیال نے ریمارکس دیئے کہ اولڈ مینجمنٹ سسٹم کو سیاسی مداخلت نے خراب کردیاہے ،صرف ریلوے نہیں ہر شعبہ میں شفافیت اور ایمانداری کو یقینی بنائیں۔
بعدزاں عدالت عظمیٰ نے آڈیٹر جنرل کو اولڈ گالف کلب کا آڈٹ کرنے کا حکم دیتے ہوئے کیس کی مزید سماعت غیر معینہ مدت کے لئے ملتوی کردی۔
