تحریک انصاف نے سیکریٹری اطلاعات نعیم الحق کے جنرل کیانی سے متعلق بیان سے لاتعلقی ظاہرکردی
اسلام آباد(ڈیلی پاکستان آن لائن) پاکستان تحریک انصاف نے اپنے سیکریٹری اطلاعات نعیم الحق کے سابق آرمی چیف اشفاق پرویز کیانی سے متعلق بیان سے لاتعلقی کا اعلان کردیا جبکہ نعیم الحق نے بھی اسے اپنی ذاتی رائے قراردیدیا،اپنے بیان کی وضاحت کرتے ہوئے نعیم الحق کاکہناتھاکہ ان کا ذاتی موقف پارٹی پالیسی کا اظہار نہیں۔
اس سے قبل نعیم الحق نے کہاتھاکہ عام انتخابات میں سابق آرمی چیف نے سعودی عرب اور امریکہ کی معاونت سے وزیراعظم نوازشریف اور ان کی پارٹی مسلم لیگ ن کو جتوایا۔جیونیوز سے گفتگو کرتے ہوئے نعیم الحق نے بتایاکہ پارٹی چیئرمین عمران خان نے انہیں ہدایت کی ہے کہ اپنے ذاتی نقطہ نظر کی وضاحت کریں اوراس سلسلے میں یہ پارٹی کا موقف نہیں، ایک کالم میں سینئر صحافی کی طرف سے سوال اٹھایاگیا، اگرایسے الزامات ایک سینئر صحافی کی طرف سے لگائے گئے ہیں تو جنرل کیانی کو اس کی وضاحت دینی چاہیے ، میں نے کہاتھاکہ ہر کوئی 2013ءکے انتخابات میں ہونیوالی دھاندلی کے بارے میں جانتاہے لیکن اس بات کا ہدف جنرل کیانی نہیں تھے۔
My comments on Geo last night about General Kayani were my own and do not reflect party stance in any way.
— Naeem ul Haque (@naeemul_haque) April 4, 2017
نعیم الحق نے وضاحت میں ٹوئیٹ بھی کیے جس میں واضح کیا کہ اُنہوں نے ذاتی نقطہ نظرپیش کیالیکن میں نے کسی چیز کا جنرل کیانی کو مورد الزام نہیں ٹھہرایا لیکن ان سے مطالبہ کیا کہ اخبارمیں ان پر لگائے جانے والے الزامات کی وضاحت کریں۔
I have not accused Gen Kayani of anything but asked him for clarification of insinuations levelled against him in a national newspaper.
— Naeem ul Haque (@naeemul_haque) April 4, 2017
نعیم الحق نے بتایاکہ بیان کے بعد ان کی عمران خان سے بات ہوئی تو اُنہوں نے اس ضمن میں وضاحت دینے کی ہدایت کی ۔ یہاں یہ امر بھی قابل ذکر ہے کہ جیونیوز کے پروگرام ’آج شاہزیب خانزادہ کیساتھ‘ میں گفتگو کرتے ہوئے نعیم الحق نے کہاکہ تحریک انصاف ملک بھر میں 60فیصدنشستوں سے جیت رہی تھی تاہم لیکن کچھ حلقوں کی جانب سے وسیع پیمانے پر دھاندلی کی وجہ سے ان کا مینڈیٹ چرالیاگیا، آدھی رات کو انتخابی نتائج روکے گئے،ریٹرننگ افسران پرہدایات پر عمل درآمد کرنے کا دباﺅتھا۔شواہد فراہم کرنے سے متعلق سوال کے جواب میں نعیم الحق کاکہناتھاکہ ’میں جنرل کیانی کو چیلنج کرتاہوں کہ وہ الزامات کی تردید کریں، ہمیں کسی قسم کا ثبوت دینے کی ضرورت نہیں، عوام حقائق سے بخوبی واقف ہیں‘۔ان کاکہناتھاکہ اگر مستقبل میں تحریک انصاف کی حکومت آئی تو عام انتخابات میں بے قاعدگیوں کی تحقیقات کیلئے کمیشن بنائیں گے ۔
