جسٹن لینگر کا ایرون فنچ کو آسٹریلیا ون ڈے ٹیم کا کپتان بنانے کا عندیہ

سڈنی(اے پی پی) آسٹریلوی ٹیم کے کوچ جسٹن لینگر نے ٹی ٹونٹی ٹیم کے کپتان اور جارح مزاج اوپننگ بیٹسمین ایرون فنچ کو ون ڈے ٹیم کا کپتان بنانے کا عندیا دے دیا۔ سٹیون سمتھ اور ڈیوڈ وارنر کی معطلی کی وجہ سے آسٹریلوی ٹیم ان دنوں مشکل دور سے گزر رہی ہے، کرکٹ آسٹریلیا نے دورہ جنوبی افریقہ کے دوران بال ٹیمپرنگ کا پلان تیار کرنے پر سمتھ اور وارنر کو ایک، ایک برس کیلئے معطل کر رکھا ہے جس کے بعد ون ڈے اور ٹیسٹ ٹیم کی قیادت ٹم پین کو سونپی گئی تھی، پین کی زیر قیادت کینگروز کو دورہ انگلینڈ کے دوران ون ڈے سیریز میں 5-0 سے شکست کا سامنا کرنا پڑا تھا۔ جسٹن لینگر نے اپنے بیان میں کہا کہ ٹیم کو اس وقت باصلاحیت اور نڈر قائد کی ضرورت ہے۔، ایرون فنچ نے سہ فریقی ٹی ٹونٹی انٹرنیشنل سیریز میں جس طریقے سے ٹیم کو فرنٹ سے لیڈ کیا وہ قابل ستائش ہے۔

اور میں چاہتا ہوں کہ فنچ دوبارہ ون ڈے ٹیم کی قیادت سنبھالیں، انہوں نے کہا کہ میں نے فنچ سے بھی اس حوالے سے بات چیت کی ہے تاہم کرکٹ آسٹریلیا حکام سے مشاورت کے بعد حتمی فیصلہ کریں گے۔