عمران قوم کا مسیحا بن کرکرپٹ لوگوں سے معاشرہ پاک کریگا،پیر پنجر سرکار

اسلام آباد(آن لائن) معروف روحانی شخصیت پیر پنجر سرکار نے پیش گوئی کی ہے کہ عمران خان قوم کا مسیحا بنے گا اور کرپٹ لوگوں سے اس معاشرے کو پاک کرے گا، قوم عمران خان کی پشت پر ہو گی اور پاکستان اگلے دو تین سال میں معاشی طور پر دنیا کے 4بڑے ممالک کی صف میں شامل ہو گا۔ آن لائن سے خصوصی گفتگو کرتے ہوئے پیر پنجر سرکار نے مزید کہا کہ سابق وزیراعظم میاں نواز شریف اب کبھی بھی اقتدار میں نہیں آئیں گے مگر وہ جلد ضمانت پر رہا ہوں گے لیکن ایک اور کیس میں انہیں سزا ہو گی اور دوبارہ جیل میں چلے جائیں گے۔ میاں شہباز شریف کے حوالے سے انہوں نے پیش گوئی کرتے ہوئے کہا ہے کہ میاں شہباز شریف کرپشن کیسز میں گرفتار ہو جائیں گے اس کے بعد مسلم لیگ( ن) کی قومی اسمبلی میں نشستیں کم ہو کر41پر آ جائیں گی،مسلم لیگ(ن) کے ممبران اسمبلی پاکستان تحریک انصاف اورمسلم لیگ( ق) میں شمولیت اختیار کریں گے۔ مولانا فضل الرحمن کے بارے میں پیش گوئی کرتے ہوئے کہا پیر پنجر سرکار نے کہاکہ مولانا فضل الرحمن کی سیاست اپنے انجام کو پہنچ گئی اب وہ کبھی ممبر اسمبلی نہیں بن سکتے اور جلد پجارو سے سائیکل پر آ جائیں گے۔ سیاست میں حمزہ شہباز شریف کا کوئی مستقبل نہیں ہے جبکہ مسلم لیگ( ن) کی قیادت مریم نواز کے ہاتھ آ جائے گی مگر وہ پارٹی کو مضبوط نہیں کر سکے گی اور پھر مسلم لیگ(ن)کے حصے بخرے ہو جائیں گے۔پیر پنجر سرکارنے ایک اور پیش گوئی کرتے ہوئے بتایا کہ پاکستان میں صدارتی نظام ہو گا اور یہ نظام 2024ء کے بعد آئے گا۔ جنرل (ر) راحیل شریف ملک کے صدر ہوں گے۔ بلاول بھٹو زرداری کے حوالے سے انہوں نے پیش گوئی کی کہ بلاول کا سیاسی مستقبل کوئی نہیں لہٰذاپیپلز پارٹی کی قیادت فاطمہ بھٹو کرے گی۔ عدلیہ کے حوالے سے انہوں نے پیش گوئی کی کہ موجودہ چیف جسٹس کے بعد جو بھی چیف جسٹس آئے گا وہ جسٹس ثاقب نثار سے بھی اچھے کام کرے گا۔ عدلیہ کا وقار بحال رہے گا۔ کرپٹ لوگ تیزی سے قانون کے شکنجے میں آئیں گے، 26اگست 2018ء سے پہلے پہلے ضیاء الحق طیارہ طرز کا کوئی اندوہناک واقعہ رونما ہو سکتاہے ،پیر پنجر سرکار نے یکم اگست 1993ء کو عمران خان کے حوالے سے پیش گوئی کی تھی کہ وہ ہنگامی سربراہ کے طور پر سامنے آئے گا جواب سچ ثابت ہوتی دکھائی دے رہی ہے۔ یکم اگست 1993ء میں ملک کے موقر روزناموں میں پیر پنجر سرکار کی پیش گوئی شائع ہو چکی ہے۔ انہوں نے مزید کہا کہ پاکستان ایک قطب ہے جس کواللہ تعالی ہر سازش سے محفوظ رکھے گا۔
پیر پنجر سرکار