”منافقت ایک طرزِ زندگی ہے“
![”منافقت ایک طرزِ زندگی ہے“](https://dailypakistan.com.pk/print_images/large/2021-12-04/news-1638573956-5279.jpg)
شہر قصور میں 2018ء میں زینب نامی ایک معصوم بچّی جنسی درندگی کی اذیّت سے گزر کر بہیمانہ قتل کا شکار ہوئی۔جہاں قصور شہر میں اس واقعہ پر خوف کی فضاء پیدا ہوئی، وہاں پورے ملک میں مختلف اجتماعات میں، ٹیلی ویژن، ریڈیو، اخباراور سوشل میڈیا پر اس اندوہناک واقعہ کو مختلف پہلوؤں سے زیرِ بحث لایا گیا اور حکومت وقت سے اس قبیح جُرم کے سَرزدگان کوکیفرِ کردار تک پہنچانے کا مطالبہ کیا گیا۔قصور شہر میں مشتعل ہجوم سڑکوں پر مارچ کرتا دِکھائی دیا۔شُرکاء جلوس کا بھی وہی مطالبہ تھا جوپورے پاکستان کے عوام کا تھا۔جلوس کے اندر نعرے لگانے والوں، لاٹھیاں اُٹھانے والوں اور حکومت سے ایکشن لینے کیلئے پرزور مطالبہ کرنے والوں میں وہ شخص بھی شامل تھا جو بعد میں اس دردناک واقعہ کا تنہا کارگزارثابت ہوا۔
کچھ عرصہ قبل ایک معزز دوست کی چودہ سالہ صاحبزادی سکول سے غائب ہو گئی۔والدین اور عزیزواقارب نے تلاش میں شہر کاقریہ،قریہ،کونا،کونا چھان مارا۔مختلف مقتدر حلقوں سے داد رسی کی درخواست گزاری،مشاورت میں وہ رشتہ دار بھی شامل تھا،جس نے اپنے صاحبزادے کے ساتھ مل کر بچّی کوسکول سے چُھٹی کے وقت اعتمادمیں لیااور اغواء کر لیا۔ رات کو اس کا جَبری نکاح پڑھوانے کے بعد اگلی صبح والدین کو اطلاع کر دی کہ بچّی نے اس کے صاحبزادے سے شادی کر لی ہے۔والدین نے عدالت میں خُلع کا مقدمہ دائر کر کے بچّی کی جان بخشی کرائی۔
اپنے سماج کے کسی بھی شُعبہ کی شکست و ریخت سے اُٹھنے والے دھوئیں کو جب بھی عمیق نظروں سے دیکھا جائے گا تومعلوم ہو گاکہ آگ لگانے والا کوئی باہر سے نہیں تھا،اور نہ ہی آگ خود سے لگی ہے بلکہ اندر سے ہی لگائی گئی ہے۔آج اخبار کے اوارق پر اُچٹتی سی نگاہ دوڑائیں،کسی بھی ٹیلی ویژن چینل کے سامنے بیٹھیں،اس پر چلنے والی خبریں اورہونے والی بحثیں سُنیں،سماجی رابطے کے صفحات دیکھیں،دوستوں میں ہونے والی تکرار،مسافروں میں باہمی تبادلہ خیال پر کان دھریں، سب کچھ صرف ایک ہی محور کے گرد گُھوم رہا ہے اور وہ ہے مہنگائی۔کوئی پٹرول کی قیمتوں،ڈالر کے نرخ،چینی کے بھاؤ اور آٹے کے بڑھتے داموں کی بات کرے گا تو کوئی بسوں اور جہازوں کے کرایوں کی شرح میں اضافہ پر نوحہ کناں ملے گا۔
چینی کے بڑھتے داموں ہی کی مثال لے لیجئے۔آج جو شخص آپ کے ساتھ بیٹھا مہنگائی کو حکومت کی نالائقی یا کوتاہی سے تعبیر کر رہا ہے۔کل معلوم ہوگا اس کے گودام میں ہزاروں ٹن چینی ذخیرہ کر کے رکھی گئی تھی تاکہ منڈی میں چینی کی قلّت پیدا ہو اور اس کے باعث حکومت نرخ بڑھانے پر مجبور ہو جائے تو وہ چینی کو بازار میں لے آئے۔اُدھر کھاد کی مثال لے لیجئے۔ کسان بیچارا پائی پائی جوڑ کر ایک بوری کھاد خریدنے کا ”اہل“بنتا ہے۔جب وہ کھاد خریدنے کے لئے مختلف کھاد ڈیلروں کے پاس جاتا ہے،تو اُسے بتایا جاتا ہے کہ جو کھاد آپ طلب کر رہے ہیں وہ تو ختم ہو گئی ہے یا ”پیچھے سے“نہیں آرہی۔ہاں البتہ اگر آپ کہیں تو کہیں سے انتظام کرا دیتے ہیں، مگر اس کے لیے آپ کو کھاد کی بوری کی اصل لاگت کے ساتھ ایک ہزار روپیہ زیادہ ادا کرنا ہوگا۔شام کو وہی کھاد فروش تھڑے پر بیٹھا دوستوں سے گَپ لگاتے ہوئے ماتھے پر تیوری چڑھا کر حکومت کی ”نالائقی“کو گالیاں دے رہا ہو گا۔حکومت کی طرف سے پٹرول کی قیمتوں میں اضافے کے متوقّع اعلان کی بھنک پاتے ہی پٹرول پمپ مالکان پٹرول کی فروخت محدود کر دیتے ہیں کیونکہ ایک یا دو دن کے بعد حَسبِ توقّع پٹرول کی قیمتوں میں اضافہ کے بعد فی لِٹر آمدنی کو وہ ”ھٰذَا مِن فَضلِ رَبِّی“ سمجھتے ہیں۔ان کے اس طرزِ فکرسے کسی ضرورت مند کا جتنا بھی نقصان ہو اانہیں اس سے کیا؟
شہر کے مُضافاتی علاقوں میں منافع خور آلو،دالیں سبزیاں، پھل اور دیگر اجناس اس اُمیدپرذخیرہ کیے بیٹھے ہیں کہ بازار میں ان اجناس کی قِلّت پیدا کر کے ان اجناس کے نرخوں کا اختیار اپنے ہاتھ میں رکھیں اور منہ مانگے دام وصول کریں۔عین ممکن ہے کہ ہمارا ”پیارا ذخیرہ اندوز“ اپنے ہاتھ میں تسبیح لئے، سر پر ٹوپی رکھے،ماتھے پر محراب چمکائے،زبان پر فصاحت و بلاغت سے بھر پور کَسبِ حلال کا درس دے رہا ہو۔مگر اپنے گریبان میں جھانکتے وقت وہ ذخیرہ اندوزی کو محض منافع بخش کاروبار تصّور کرتا ہوگا۔حالانکہ وہ رسولِ پاکؐ کے فرمان سے بخوبی آگاہ ہے کہ جو بھی خوراک کی ذخیرہ اندوزی کرتا ہے اللہ تعالیٰ عزّوجلّ اسے غربت اور کوڑھ جیسے مرض سے دوچار کرے گا۔پھر فرمایا کہ سوائے گُمراہ شخص کے کوئی بھی ذخیرہ اندوزی نہیں کرتا۔
ہماری زندگی کی ناؤ اسی طرح روانی سے بہتی جا رہی ہے۔ اگر کوئی فردِ واحدیا افراد کا چھوٹا ساگروہ اس ندی کے بہاؤ کے خلاف تیرنے کی کوشش کرتا ہے تو اکثر ڈوب جاتا ہے۔ اور اگر کوئی بچ نکلے تو معاشرہ اسے غیر معقول، رِجعت پسند اور پتہ نہیں کیا کیا خطابات عنایت کرتا ہے۔ آج اگرہم مہنگائی کوقابو میں رکھنا چاہتے ہیں تو حکومت کے پیچھے پڑنے کے ساتھ ساتھ اپنا کردار بھی تو ادا کریں۔اِردگرد نظر دوڑائیں۔عین ممکن ہے،آپ کا کوئی”دوست“”غمخوار“یا پڑوسی کسی اہم”ضرورت زندگی“کا ذخیرہ کیے بیٹھا ہو،جس کے باعث اس”ضرورت زندگی“ کے نرخ عام آدمی کی دسترس سے باہر ہوتے جا رہے ہیں۔قطع نظر تعلق یا رشتہ داری کے اگر ہم ذخیرہ اندوزوں کی نشاندہی کرنا اپنے اوپر فرض کر لیں اور ذِمّہ دار حلقوں تک اطلاع کرنااخلاقی ذِمّہ داری بنا لیں تو مہنگائی کی شرح حوصلہ افزاء حد تک کم ہو جائے گی، مگر ہم ایسا کیوں کر کریں؟ جس طرف نظر اُٹھائیں،جس سے بات کریں،منافقت طرزِ زندگی ہے۔ اور اگر ہم نے یہ طرز زندگی نہ بدلا تو موجودہ حکومت تو کیا آنے والی کوئی بھی حکومت یا طاقتور سُورما مہنگائی کے جن کو بوتل میں کبھی بند نہ کر پائے گا۔اور مرض بڑھتا جائے گا۔ذخیرہ اندوزی ہو، اخلاقیات یا معاشرت جس شعبہئ زندگی کی بات کریں،”منافقت آج ایک طرزِ زندگی ہے“۔