سردی کا راج برقرار، پہاڑوں پر برفباری، گلیات میں رابطہ سڑکیں بند

لاہور(مانیٹرنگ ڈیسک،ایجنسیاں) ملک میں سردی کا راج برقرار ہے، پہاڑوں پر برفباری کے بعد وائٹ کارپٹ بچھا ہے۔ سب سے زیادہ سردی سکردو میں منفی 9 ریکارڈ کی گئی(بقیہ نمبر11صفحہ12پر )

جبکہ اسلام آباد 4، لاہور 5 اور کراچی میں 13 ڈگری سینٹی گریڈ ریکارڈ کیا گیا۔ملک بھر میں سردی کے ڈیرے، بالائی علاقوں میں سفیدی ہی سفیدی چھائی ہے جس سے موسم شدید سرد ہے، گلیات اور بٹگرام کے علاقوں میں دو روز بعد بھی راستے نہ کھولے جا سکے۔ رابطہ سڑکیں بند ہونے سے لوگوں کو آمدورفت میں مشکلات کا سامنا ہے۔محکمہ موسمیات کا کہنا ہے آئندہ چوبیس گھنٹوں کے دوران ملک کے بیشتر علاقوں میں موسم سرد اور خشک رہے گا۔ تاہم بالائی علاقوں میں مطلع جزوی طور پر ابرآلود رہنے اور جنوبی پنجاب اور بالائی سندھ میں صبح کے وقت ہلکی دھند پڑنے کا امکان ہے۔گزشتہ روز سب سے کم درجہ حرارت سکردو میں منفی 9، بگروٹ منفی 8، کالام ، استور منفی 7، مالم جبہ 5، قلات منفی 4، ہنزہ اور مری منفی 3 اور کوئٹہ میں منفی 1 ڈگری سینٹی گریڈ ریکارڈ کیا گیا۔ اسلام آباد میں کم سے کم درجہ حرارت 4، لاہورپانچ، فیصل آباد 6، ملتان 5، پشاور 4 اور کراچی میں 13 ڈگری ریکارڈ کیا گیا۔وادی کوئٹہ سمیت شمالی بلوچستان میں آج سے بارش اور پہاڑوں پر برفباری کا امکان ہے مغرب سے بارش برسانے والے سسٹم داخل ہوگیا ۔محکمہ موسمیات کے مطابق رواں ماہ پاکستان بھر میں 4 سے 5 بارش برسانے والے سلسلے داخل ہونے کا امکان ہے اور نئے سلسلوں کے داخل ہونے سے پورے ملک کے طول و عرض میں بارشیں ہوں گی اور ان بارشوں کے باعث سندھ و بلوچستان کے خشک اور قحط زدہ علاقوں میں بھی صورتحال بہتر ہو جائے گی۔
موسم