شیخ رشید کو جسمانی ریمانڈ مکمل ہونے پر آج عدالت پیش کیا جائے گا
اسلام آباد: (ڈیلی پاکستان آن لائن) سربراہ عوامی مسلم لیگ شیخ رشید کو جسمانی ریمانڈ مکمل ہونے پر آج اسلام آباد کی عدالت میں دوبارہ پیش کیا جائے گا۔
نجی ٹی وی دنیا نیوز کے مطابق پولیس سابق وفاقی وزیر شیخ رشید کو اسلام آباد کی ڈسٹرکٹ اینڈ سیشن کورٹ میں پیش کرے گی، کیس کی سماعت جوڈیشل مجسٹریٹ عمر شبیر کریں گے۔
یاد رہے کہ شیخ رشید کو سابق صدر آصف زرداری کے خلاف عمران خان کے قتل کی سازش سے متعلق بیان پر گرفتار کیا گیا ہے۔ گزشتہ سماعت پر پراسیکیوٹر نے وائس میچنگ اور فوٹو گرامیٹک ٹیسٹ کرانے کیلئے جسمانی ریمانڈ کی استدعا کی تھی، شیخ رشید کے وکلاء کی جانب سے جسمانی ریمانڈ کی مخالفت کی گئی تھی تاہم عدالت نے سابق وفاقی وزیر کے وکلا کی استدعا مسترد کر دی تھی۔
یہ امر قابل ذکر ہے کہ شیخ رشید کے خلاف کراچی میں بھی مقدمہ قائم کیا گیا ہے جس کی سماعت کراچی میں متوقع ہے جبکہ ایک اور مقدمہ مری میں بھی درج کروایا گیا ہے۔
