کم سن طلبہ کو جنسی استحصال کا نشانہ بنانے والے استاد کو سزا مل گئی
پاک پتن (ویب ڈیسک) پاک پتن کے گاؤں چک چنوت کے ایک سرکاری پرائمری سکول کے ایک استاد کو کم سن طلبہ کو جنسی استحصال کا نشانہ بنانے کے الزام پر ملازمت سے معطل کردیا گیا، ملکہ ہنس پولیس نے بھی سکول کا دورہ کیا اور معاملے کی ابتدائی چھان بین کی۔
ڈان اخبار کی رپورٹ کے مطابق چیف ایگزیکٹو افسر (ایجوکیشن) عبدالمجید نے بتایا کہ مذکورہ استاد کو ڈسٹرکٹ ایجوکیشن آفیسر پاک پتن نے ان کے خلاف شکایات موصول ہونے کے بعد معطل کیا۔طلبہ نے اپنے والدین کو بتایا تھا کہ ان کے استاد نے پانچ طلبہ کو ریپ کیا جن کی عمریں 10 سے 12 سال کے درمیان تھیں۔
مذکورہ بالا سکول کے طلبہ کے والدین نے شکایات درج کرائی تھیں اور ڈپٹی کمشنر قدرت اللہ قیوم سے معاملے کا نوٹس لینے کا مطالبہ کیا تھا جس کے بعد ضلع کے سکول ایجوکیشن ڈپارٹمنٹ نے گورنمٹ ہائی سکول کرتارپور کے ہیڈ ماسٹر لیاقت علی کی سربراہی میں ان الزامات کی تحقیقات کے لیے 2 رکنی کمیٹی بنائی تھی۔عبدالمجید نے کہا کہ محکمہ مزید کارروائی کے لیے انکوائری کی رپورٹ کا انتظار کررہا ہے۔
