حکومت کی انتقامی کارروائیوں کے پیچھے کچھ اور لوگ ہیں: عمران خان کی پرویز الہٰی سے ملاقات کے دوران گفتگو
لاہور (ڈیلی پاکستان آن لائن) چیئرمین تحریک انصاف عمران خان نے سابق وزیر اعلیٰ پنجاب پرویز الہٰی سے ملاقات کے دوران کہا ہے کہ حکومت کی انتقامی کارروائیوں کے پیچھے کچھ اور لوگ ہیں۔
نجی ٹی وی" ایکسپریس نیوز" کے مطابق سابق وزیراعظم عمران خان اور چوہدری پرویز الہٰی نے ملاقات کے دوران شیخ رشید پر مقدمات سمیت حکومت کے منفی ہتھکنڈوں کا ڈٹ کر مقابلہ کرنے کے عزم کا اظہار کیا۔ اس موقع پر عمران خان کا کہنا تھا کہ حکومت کی انتقامی کارروائیوں کے پیچھے کچھ اور لوگ ہیں، حکومت کو انتخابات کی تاریخ دینی پڑے گی ورنہ آئین شکنی کی مرتکب ہو گی، حکومت الیکشن سے نہیں بھاگ سکتی۔ چیئرمین تحریک انصاف نے کہا کہ حکومت کی ناک تلے دہشت گردی دوبارہ سر اٹھا رہی ہے، حکومت کو امن و امان کی نہیں، مخالفین کو کچلنے کی فکر ہے۔
چوہدری پرویز الہی نے کہا کہ حکومت ملکی معیشت تباہ کر چکی، امن و امان کی صورت حال بھی تیزی سے خراب ہو رہی ہے، پی ڈی ایم کی حکومت بد ترین بوکھلاہٹ کا شکار ہے، پارلیمانی لاجز کے تالے توڑے جا رہے ہیں، حکومت گرفتاریوں ، مقدمات اور چھاپوں کے سائے میں اے پی سی کی دعوت دے رہی ہے۔ شہباز شریف کی شو بازیاں بری طرح ایکسپوز ہو رہی ہیں۔
سابق وزیراعلیٰ پنجاب کا مزید کہنا تھا کہ شہباز شریف کے پاس عوامی ریلیف کیلئے تو کچھ ہے نہیں، صرف عمران خان اور اتحادیوں کو کچلنے کا ایجنڈا سرگرم ہے۔
