مریم نواز کی محنت سے پنجاب میں بہتری نظر آرہی ہے: نواز شریف 

          مریم نواز کی محنت سے پنجاب میں بہتری نظر آرہی ہے: نواز شریف 

  IOS Dailypakistan app Android Dailypakistan app

                                                                         لاہور (آئی این پی) مسلم لیگ (ن) کے صدر اور سابق وزیراعظم نواز شریف نے کہا ہے مریم نواز کی محنت سے پنجاب میں بہتری نظر آ رہی ہے۔ صدر مسلم لیگ (ن) نواز شریف اور وزیراعلیٰ پنجاب مریم نواز سے راولپنڈی، اٹک، مری، چکوال، وزیرآباد، حافظ آباد اور منڈی بہا الدین سے پنجاب اسمبلی کے ارکان نے ملاقات کی، جس میں ملک کی مجموعی صو ر تحال، عوام کے مسائل اور حلقوں میں ترقیاتی کام زیر غور آئے۔ ارکان اسمبلی نے وزیراعلیٰ پنجاب مریم نواز کو صوبے میں بہترین کارکردگی پر خراج تحسین پیش کیا۔ اس موقع پر گفتگو کرتے ہوئے سابق وزیراعظم نواز شریف نے کہا آپ سب میری طاقت اور عزت ہیں، الحمدللہ، عوام کی مشکلات میں کمی آ رہی ہے، وزیراعلیٰ پنجاب مریم نوازنے کہا پنجاب وا حد صوبہ ہے جہاں روٹی 12سے 14روپے میں مل رہی ہے، ہماری کارکردگی پر سب سے بڑا چیک عوام اور نوازشریف ہیں۔ دوران ملاقات ارکان اسمبلی نے کہا وزیراعلیٰ مریم نواز نے نواز شریف اور شہباز شریف کے دور اور کارکردگی کی یاد تازہ کر دی ہے، سیاسی تعصبات سے پاک شفافیت اور میرٹ پر ترقیاتی کاموں کی تکمیل خوش آئند اور مثبت سیاسی روا یت ہے،سستی اور وافر کھاد کی دستیابی پر وزیراعلیٰ مریم نواز مبارک اور شاباش کی مستحق ہیں، کسان کارڈ کی وجہ سے آڑھتیوں سے چھٹکارا ملنے پر کاشتکار خوشحال ہوا، صحت کے پور ے نظام کی بہتری، مفت ادویات اور گھر کی دہلیز پرعلاج، ہونہار سکالر شپ کی فراہمی اور ستھرا پنجاب کی سکیمیں قابل تحسین ہیں، اجتماعی شادیوں کے دھی رانی پروگرام کو عوام میں بہت پذیرائی ملی ہے۔ اس موقع پر وزیراعلی پنجاب مریم نواز نے راولپنڈی رنگ روڈ دسمبر تک مکمل کرنے کی ہدایت کی جبکہ راولپنڈی اور گوجرانوالہ ڈویژن کے ترقیاتی منصوبے بر و قت مکمل کرنے کا بھی حکم دیا۔

نوازشریف

مزید :

صفحہ اول -