جی ڈی اے کا 8 فروری کو سندھ بھر میں یوم سیاہ منانے کا اعلان
کراچی (اسٹاف رپورٹر)گرینڈ ڈیموکریٹک الائنس(جی ڈی اے)نے جعلی انتخابات، نئے کینال نکالنے، امن و امان کی خراب صورتحال اور متنازعہ پیکا قوانین کے خلاف 8 فروری کو سندھ بھر میں یوم سیاہ منانے کا اعلان کردیا۔جی ڈی اے کے سیکریٹری جنرل ڈاکٹر صفدر عباسی نے اپنے بیان میں کہا کہ 8 فروری کا دن ملکی تاریخ کا سیاہ ترین دن تھا، جب ریکارڈ دھاندلی کے ذریعے سندھ کے عوام کا مینڈیٹ چوری کیا گیا اور جی ڈی اے کے امیدواروں کو زبردستی شکست دی گئی۔ کارکنان اس دن سیاہ پرچم لہرائیں گے اور بازوں پر سیاہ پٹیاں باندھیں گے، ضلعی ہیڈ کوارٹرز کے پریس کلبوں کے سامنے پرامن احتجاجی مظاہرے کیے جائیں گے۔انہوں نے مزید کہا کہ 26ویں آئینی ترمیم نے ملک میں آئینی بحران کو جنم دیا ہے اور اب تو جج بھی سیاسی جماعتوں کے حمایت یافتہ مقرر کیے جا رہے ہیں، جو عدالتی نظام کی شفافیت پر سوالیہ نشان ہے۔ڈاکٹر صفدر علی عباسی نے متنازعہ پیکا قوانین پر کڑی تنقید کرتے ہوئے کہا کہ ان قوانین کے نفاذ سے آزاد صحافت کی آواز کو دبایا نہیں جا سکتا۔ انہوں نے حکومت سے عوام دشمن پیکا قوانین کو فوری واپس لینے کا مطالبہ کیا۔سندھ میں پانی کی قلت پر بات کرتے ہوئے جی ڈی اے کے سیکریٹری جنرل نے کہا کہ پہلے ہی صوبے میں کسان اور کاشتکار پانی کی کمی سے شدید متاثر ہیں اور اب دریائے سندھ پر نئے کینال بنا کر زمینوں کو بنجر بنانے کی ایک گہری سازش کی جا رہی ہے۔ انہوں نے کہا کہ چیئرمین واپڈا نے حالیہ بریفنگ میں نئے کینال بنانے کی ذمہ داری کو آشکار کیا، جس سے واضح ہوتا ہے کہ یہ سارا منصوبہ پاکستان پیپلزپارٹی کی قیادت کی منظوری سے کیا جا رہا ہے۔