یادماضی عذاب ہے،نظریں صرف مستقبل پرہیں،محمدعامر

یادماضی عذاب ہے،نظریں صرف مستقبل پرہیں،محمدعامر

  

لندن(آئی این پی)اسپاٹ فکسنگ میں سزا یافتہ محمد عامر نے کہا ہے کہ پانچ سالہ پابندی کے دوران انہیں خطرہ محسوس ہوا تھا کہ شاید وہ دوبارہ کبھی کرکٹ نہ کھیل سکیں لیکن اب ان کا ہدف دنیا کا بہترین باؤلر بننا ہے۔ اپنے ایک انٹرویو میں عامر نے کہا کہ میں نے تین سال گیند کو ہاتھ تک نہیں لگایا۔چھ سال قبل 2010 کے لارڈز ٹیسٹ کے دوران اسپاٹ فکسنگ کے سبب پانچ سالہ پابندی کا سامنا کرنے والے محمد عامر 14 جولائی کو انگلینڈ کے خلاف اسی میدان سے دوبارہ اپنا ٹیسٹ کیریئر شروع کرنے کیلئے تیار ہیں۔اور اب 24 سالہ عامر کی نظریں دنیا کا بہترین بالر بننے پر مرکوز ہیں۔انہوں نے بتایا کہ زندگی بہت سخت تھی اور ایسے مواقع بھی آئے جب مجھے لگا کہ شاید میں دوبارہ کبھی نہ کھیل سکوں، میں نے تین سال تک گیند تک نہ اٹھائی۔عامر نے کہا کہ یہ صورتحال میرے لیے بہت مایوس کن تھی کیونکہ بحیثیت پیشہ ورانہ کرکٹر یہ بہت مشکل ہے کہ آپ سہولتوں کا استعمال نہ کر سکیں، کرکٹ نہ کھیل سکیں، گیند کو ہاتھ تک نہ لگا سکیں، تو پھر آخر آپ کیا کریں گے۔یہ بہت خوفناک یادیں ہیں، لیکن اب یہ میری مدد کر رہی ہیں کیونکہ میں نے بہت کچھ سیکھا ہے اور میں بہت انسان اور اچھے رویے کا حامل کرکٹر بننا چاہتا ہوں۔فاسٹ بالر نے کہا کہ میں اب بھی سیکھنے کے عمل سے گزر رہا ہوں اور پرفیکٹ انسان نہیں بن سکتا۔ لیکن جو ہو گیا وہ ماضی کا حصہ ہے اور اب میری نظریں مستقبل پر مرکوز ہیں۔ میں اپنے ملک کیلئے بہترین کرکٹر بننا چاہتا ہوں۔ اگر میں محنت کروں گا تو میرے لیے اصل ہدف دنیا کا بہترین بالر بننا ہے۔قومی ٹیم میں دوبارہ واپسی کے حوالے سے اپنے تاثرات کا اظہار کرتے ہوئے عامر نے کہا کہ اپنے ملک کی دوبارہ نمائندگی کرنا میرے لیے بہت بڑا اعزاز ہے اور خصوصا اسی ٹیم، اسی ٹیم، انہی شائقین کے سامنے۔ میرے لیے تو یہ ایک معجزہ ہے لیکن ساتھ ساتھ میرے خوابوں کی تعبیر بھی۔24 سالہ فاسٹ باؤلر کا ماننا ہے کہ اپنے ہوم گراؤنڈ پر انگلینڈ انتہائی سخت حریف ثابت ہو گا لیکن پاکستان انہیں زیر کرنے کیلئے اپنی بہترین کارکردگی کا مظاہرہ کرے گا۔انگلینڈ ایک اچھی ٹیم ہے خصوصا اپنی ہوم کنڈیشنز میں وہ بہت بہترین ٹیم ہے لیکن ہم سخت محنت کر کے انہیں ہرانے کی کوشش کریں گے۔

مزید :

کھیل اور کھلاڑی -