کس شخص کی گرفتاری کے بعد تین ہفتے سے اے این ایف رانا ثناللہ کا پیچھا کر رہی تھی ؟ وزیر مملکت شہریار آفریدی نے ساری کہانی سنا دی ، تہلکہ خیز دعویٰ کر دیا

لاہور (ڈیلی پاکستان آن لائن )وزیر مملکت شہریار آفریدی نے کہاہے کہ فیصل آباد ایئر پورٹ پر ایک  منشیات کا ڈیلر گرفتار ہوا جس سے ہمیں لیڈز ملیں اور تین ہفتوں تک رانا ثنااللہ کی موومنٹ کو مانیٹر کیا گیا جس کی ہمارے پاس فوٹیج اور تمام چیزیں بھی موجود ہیں ، تمام ثبوت عدالت کے سامنے پیش کیے جائیں گے ، رانا ثنااللہ کو عالمی کارندوں کی نشاندہی پر گرفتار کیا گیا ہے۔پریس کانفرنس سے خطاب کرتے ہوئے وزیر مملکت شہریار آفریدی نے کہاہے کہ پورے پاکستان میں گزشتہ تین دنوں سے رانا ثنااللہ کے بارے میں بحث چل رہی ہے ، 1200 کے قریب لوگوں کو گرفتار کیا گیا ، آج جو رانا ثنااللہ کیلئے حق میں آواز اٹھا رہے ہیں وہ باقی 1200 کیلئے کیوں خاموش رہے ، جب رانا ثنااللہ کے بارے میں بات شروع ہوتی ہے تو فیصل آباد میں ایئر پورٹ پر ایک گرفتار عمل میں آئی جس کا کریڈٹ اے این ایف کو جاتاہے ، اس کے بعد ہمیں لیڈز ملیں جن پر کام کرتے ہوئے تقریبا تین ہفتے رانا ثنااللہ کی گاڑی اور ان کی موومنٹ کو مانیٹر کیا گیا اور اس کی فوٹیج سمیت تمام تر چیزیں ہمارے پاس موجود ہیں ۔ شہریار آفریدی کا کہناتھا کہ سب سے مشکل کام سڑک پر موومنٹ ہے ، عام گاڑی ناکوں پر پکڑی جاتی ہے جبکہ بڑانام اور عہدوں والوں کو ناکوں پر بھی نہیں روکا جاتا ۔ پکڑی جانے والی 15 کلو ہیروئن کی عالمی مارکیٹ میں قیمت 15 سے 16 کروڑ روپے ہے ، طاقتو ر لوگ ملوث نہ ہوں تو یہ کام چل ہی نہیں سکتا ہے ، رانا ثنااللہ کیلئے آواز اٹھانے والوں کیلئے پیغام ہے کہ ابھی بہت کچھ سامنے آ ئے گا ۔ان کا کہناتھا کہ یہ 15 کلو ہیروئن لاہور جانی تھی اور وہاں سے اس نے انٹر نیشنل مارکیٹ میں جانا تھا ، یہ 15 کلو ہیروئن کی بات نہیں ہے بلکہ پاکستان کی عزت اور سالمیت کی بات ہے ، کیا عالمی سطح پر پاکستان کی ماضی کی حکومتوں نے اس چیز کو فروغ دیا ، تمام چیزیں عدالت میں پیش کی جائیں گے ۔ ان کا کہناتھا کہ یہ اتنے خطر ناک قسم کے لوگ ہیں کہ ہم تمام تفصیلات بھی نہیں دے سکتے ۔ان کا کہناتھا کہ اے این ایف کے پورے پاکستان میں 29 پولیس سٹیشن ہیں اور تین ہزار کے قریب نفری ہے ۔