انتقامی سیاست پی ٹی آئی کا نظریہ نہیں ، حکومت پر الزام لگا کر اپوزیشن جرائم سے توجہ ہٹانا چاہتی ہے: وزیر اعظم

اسلام آباد (ڈیلی پاکستان آن لائن) وزیر اعظم عمران خان کا کہنا ہے کہ راناثناءاللہ کی گرفتاری سے حکومت کا کوئی لینا دینا نہیں ہے۔انتقام کی سیاست پی ٹی آئی کا نظریہ نہیں ، حکومت پر الزام لگا کر اپوزیشن جرائم سے توجہ ہٹانا چاہتی ہے، بے نامی جائیداد رکھنے والوں کے خلاف بلا تفریق کارروائی ہوگی۔ نجی ٹی وی دنیا نیوز کے مطابق وزیر اعظم کی زیر صدارت پارٹی ترجمانوں اور رہنماؤں کا اجلاس ہوا جس میں وفاقی وزراءنے بھی شرکت کی۔ اجلاس میں ملک کی موجودہ سیاسی صورتحال کا جائزہ لیا گیا اور اپوزیشن رہنماؤں کی گرفتاریوں کے بعد پیدا ہونے والی صورتحال پر مشاورت کی گئی ۔ وزیر اعظم نے واضح کیا کہ راناثناءاللہ کی گرفتاری سے حکومت کا کوئی لینا دینا نہیں ہے۔ انہوں نے کہا کہ انتقام کی سیاست پی ٹی آئی کا نظریہ نہیں ہے، پاکستان میں ادارے اور عدالتیں اب آزاد ہیں، حکومت پر الزام لگا کر اپوزیشن جرائم سے توجہ ہٹانا چاہتی ہے۔ وزیر اعظم نے دوران بجٹ اپوزیشن کی تنقید کا جواب دینے پر ترجمانوں کی تعریف کی۔ وزیر اعظم عمران خان نے اجلاس کے دوران اپنے دورہ امریکہ سے متعلق بھی بات کی اور کہا کہ اس دورے سے دونوں ممالک کے تعلقات میں بہتری آئے گی۔ ٹیکس ایمنسٹی سکیم ختم ہونے پر بے نامی جائیدادوں کے خلاف کارروائی کے بارے میں وزیر اعظم نے کہا کہ بے نامی جائیداد رکھنے والوں کو پورا موقع دیا گیا، ان کے خلاف بلا تفریق کارروائی ہوگی۔