ملزم کو 14کے بجائے 30دن تک جسمانی ریمانڈ پر رکھا جائیگا، نیب ترمیمی آرڈیننس جاری
اسلام آباد(مانیٹرنگ ڈیسک)قائم مقام صدر صادق سنجرانی نے قومی احتساب بیورو (نیب) ترمیمی آرڈیننس 2023 جاری کر دیا۔قائم مقام صدر صادق سنجرانی نے نیب ترمیمی آرڈیننس پر دستخط کیے اور انہوں نے آرڈیننس وزیر اعظم کی ایڈوائس پر جاری کیا۔نیب ترمیمی آرڈیننس کے مطابق گرفتار ملزم کو 14 کے بجائے 30 دن تک جسمانی ریمانڈ پر رکھا جا سکے گا۔آرڈیننس کے تحت چیئرمین نیب تفتیش میں عدم تعاون پرملزمان کے وارنٹ گرفتاری جاری کرسکیں گے۔ذرائع وزارت قانون و انصاف کے مطابق وفاقی کابینہ نے مجوزہ ترامیم کی منظوری دی تھی۔وفاقی کابینہ کے ذرائع نے بتایا نیب ترامیم پر کابینہ کے اجلاس میں سب سے آخر میں کارروائی کی گئی اور تمام بیوروکریٹس کو کابینہ کے بند کمرے کے اجلا س سے باہر نکال دیا گیا۔واضح رہے کہ صدارتی آرڈیننس کی راہ ہموار کرنے کیلئے پیر کی شام قومی اسمبلی کے اجلاس کو غیر معینہ مدت کیلئے ملتوی کرنے کا نوٹیفکیشن جاری کیا گیا۔ ا س سے قبل سپیکر قومی اسمبلی نے 26 جون کو قومی اسمبلی کا اجلاس 17 جولائی تک ملتوی کیا تھا۔قومی اسمبلی کا اجلاس جاری ہو تو صدارتی آرڈیننس جاری نہیں کیا جا سکتا یہی وجہ ہے اس سے قبل قومی اسمبلی اجلاس کو ملتوی کیا گیا۔خیال رہے صدر مملکت ڈاکٹر عارف علوی ان دنوں بیرون ملک ہیں اور ان کی جگہ چیئرمین سینیٹ صادق سنجرانی قائم مقام صدر ہیں۔
آرڈیننس
