آئی جی پنجاب کی سنٹرل پولیس آفس میں کھلی کچہری
لاہور (کر ائم رپو رٹر)انسپکٹر جنرل پولیس پنجاب ڈاکٹر عثمان انور شہریوں کے مسائل کے ازالے کیلئے شب و روز مصروف عمل ہیں، اسی تسلسل میں آئی جی پنجاب ڈاکٹر عثمان انور نے شہریوں کو درپیش مسائل کے ازالے کیلئے سنٹرل پولیس آفس میں کھلی کچہری کا انعقاد کیا اور شہریوں کے مسائل سن کر فوری ریلیف کیلئے احکامات جاری کئے کچہری میں آئی جی پنجاب نے پولیس ملازمین اور انکے اہل خانہ کی جانب سے پیش کردہ مسائل بھی سنے۔ آئی جی پنجاب نے شہداءکی فیملیز کو درپیش مسائل کے ازالے کیلئے مزید اقدامات کرنے کا حکم دیتے ہوئے کہا کہ آر پی اوز ، ڈی پی اوز مقامی سطح پر شہداءکی فیملیز کے ساتھ رابطے میں رہیں اور ہر ممکن ریلیف فراہم کریں ۔ ڈاکٹر عثمان انور نے کہا کہ پنجاب پولیس ایک خاندان کی مانند ہے ، بحیثیت سربراہ خاندان کے تمام افراد کی بہترین دیکھ بھال میری اولین ترجیح ہے ۔ آئی جی پنجاب نے کہا کہ پوری فورس کی ہیلتھ سکریننگ مکمل کر لی گئی ، ویکسی نیشن اور تشخیص شدہ بیماریوں کے علاج کا عمل جاری ہے۔ ڈاکٹر عثمان انور نے کہا کہ ہمارے پھول پراجیکٹ سے پولیس ملازمین کے سپیشل بچوں کو علاج معالجے کی ہر ممکن سہولت فراہم کی جارہی ہے۔۔
آئی جی پنجاب نے ہدایت کی کہ پولیس ملازمین کے بچوں کی اعلی تعلیم ، روزگار اور دیگر مسائل کے ازالے کیلئے ترجیحی اقدامات جاری رکھے جائیں ۔
