لاہور( ڈیلی پاکستان آن لائن )چیئرپرسن پنجاب ویمن پروٹیکشن اتھارٹی حنا پرویز بٹ کا ڈی پی او آفس شیخوپورہ کا دورہ، زیادتی کا نشانہ بننے والی کمسن بچی اور والدہ سے ملاقات، مقدمے کی تفصیلی پیش رفت کا جائزہ لیا اور انصاف کی فراہمی کی یقین دہانی کرائی ۔
چیئرپرسن پنجاب ویمن پروٹیکشن اتھارٹی و رکن پنجاب اسمبلی حنا پرویز بٹ نے وزیراعلیٰ پنجاب مریم نواز کی ہدایت پر ضلع شیخوپورہ کا دورہ کیا اور ڈی پی او آفس میں زیادتی کا شکار 6 سالہ بچی اور اس کے خاندان سے ملاقات کی۔ متاثرہ کو رات کے وقت گھر سے اغوا ءکر کے کھیتوں میں لے جاکر زیادتی کا نشانہ بنایا گیا تھا۔
حنا پرویز بٹ کو پولیس حکام کی جانب سے مقدمے کی مکمل تفتیشی پیش رفت سے آگاہ کیا گیا۔ رپورٹ کے مطابق ملزم امام بخش ولد شیر محمد کو گرفتار کر کے جوڈیشل ریمانڈ پر جیل بھیجا جا چکا ہے۔ متاثرہ بچی کا میڈیکل معائنہ، ڈی این اے اور تمام ضروری فرانزک رپورٹس مکمل کی جا چکی ہیں جبکہ چالان جلد عدالت میں پیش کیے جانے کے مراحل میں ہے۔ کیس کی تفتیش ایس آئی یو شیخوپورہ کی نگرانی میں جاری ہے۔
اس موقع پر حنا پرویز بٹ نے پولیس اور تفتیشی افسران کو ہدایت دی کہ مقدمے کو جلد از جلد منطقی انجام تک پہنچایا جائے اور ملزم کو سخت سے سخت سزا دلوائی جائے۔ انہوں نے کہا کہ وزیراعلیٰ پنجاب مریم نواز کی واضح ہدایت ہے کہ خواتین اور بچوں کے خلاف جرائم پر کسی قسم کی کوتاہی یا نرمی برداشت نہیں کی جائے گی۔
چیئرپرسن پنجاب ویمن پروٹیکشن اتھارٹی نے متاثرہ خاندان کو ہر ممکن قانونی، طبی اور نفسیاتی معاونت فراہم کرنے کی یقین دہانی کروائی۔ انہوں نے کہا کہ یہ واقعہ محض ایک بچی پر ظلم نہیں بلکہ معاشرے کے ضمیر پر حملہ ہے، اور ریاست کی ذمہ داری ہے کہ وہ مظلوم کے ساتھ کھڑی ہو کر مجرم کو کٹہرے میں لائے۔
انہوں نے ضلع شیخوپورہ میں خواتین کے دیگر کیسز پر بھی پیش رفت کا تفصیلی جائزہ لیا اور ضلعی ویمن پروٹیکشن آفیسرز کو فعال اور الرٹ رہنے کی ہدایت کی۔ حنا پرویز بٹ نے کہا کہ پنجاب حکومت خواتین کے تحفظ کے لیے سنجیدہ اور منظم اقدامات کر رہی ہے تاکہ ہر مظلوم عورت کو فوری اور مکمل انصاف ملے۔
انہوں نے آخر میں کہا کہ اگر کسی خاتون یا بچی کو زیادتی، تشدد یا ہراسانی کا سامنا ہے تو وہ بلاخوف 1737 پر کال کرے یا پنجاب ویمن پروٹیکشن اتھارٹی کے دفتر سے رابطہ کرے، ہم ہر متاثرہ خاتون کے ساتھ کھڑے ہیں۔