پیپلزپارٹی کا لاہور میں عوامی طاقت کے مظاہرے کا فیصلہ
لاہور(ڈیلی پاکستان آن لائن) پاکستان پیپلزپارٹی نے لاہورمیں بڑا جلسہ کرنے کا فیصلہ کرلیا ہے۔
دنیا نیوز کے مطابق پیپلزپارٹی کے شریک چیئرمین اور سابق صدر آصف علی زرداری نے صوبائی دارلحکومت میں جلسہ کرنے کی اجازت دے دی ہے جس کے بعد پیپلزپارٹی لاہورکے صدر اسلم گل شہر میں متحرک ہوگئے ہیں، ان کی جانب سے مختلف علاقوں کا دورہ بھی کیا گیا ہے، پارٹی قیادت کی جانب سے اسلم گل کو جلسے سے قبل عوامی رابطہ مہم تیز کرنے کی ہدایت کی گئی ہے۔ اسلم گل کا کہنا ہے کہ فی الحال جلسے کی تاریخ کا فیصلہ نہیں کیا گیا ہے، اس حوالے سے پارٹی قیادت جلد اعلان کرے گی۔
خیال رہے کہ پیپلزپارٹی کے شریک چیئرمین اور سابق صدر مملکت آصف علی زرداری نے اس وقت لاہور کو اپنی سیاست کا مرکز بنایا ہوا ہے ، وہ اس وقت لاہور میں قیام پذیر ہیں اور پنجاب میں پارٹی کو مضبوط کرنے کے لیے سیاسی جوڑ توڑ میں مصروف ہیں۔
