افضل گورو کی باقیات واپس کی جائیں

افضل گورو کی باقیات واپس کی جائیں

  

 سری نگر(کے پی آئی) مقبوضہ جموں و کشمیر میں حکومت سازی کے ایک روز بعد پی ڈی پی نے محمد افضل گورو کے باقیات کی واپسی کامطالبہ کیا ۔ پی ڈی پی کے8 ممبران اسمبلی نے ایک مشترکہ بیان میں افضل گورو کی پھانسی کی سزا منسوخ کرنے سے متعلق آزاد امیدوار انجینئر عبدالرشید کی طرف سے لائی گئی قرار دا د کو جائز قرار دیتے ہو ئے کہا ہے۔ کہ اس قرارداد کوریاستی قانون سازیہ میں اس وقت ہی ایوان میں اختیارکیا جانا چاہئے تھا ۔محمد خلیل بند ، ظہور احمد میر ، راجہ منظور احمد ، محمد عباس وانی ، یاور دلاور میر ،ایڈو کیٹ محمد یوسف ، اعجاز احمد میر اور نور محمد شیخ نے کہا ہے کہ پی ڈی پی کا ہمیشہ یہ موقف رہا ہے کہ افضل گورو کی پھانسی انصاف کا خون تھا اور اس سلسلہ میں آئینی لوازمات اور قواعد پورے نہیں کئے گئے تھے ۔بیان کے مطابق گورو کو 28ویں سیریل نمبر سے اٹھا کر پھانسی دی گئی ،جس کی پی ڈی پی نے بھی مذمت کی تھی ۔ بیان میں مزید کہا گیا ہے کہ پارٹی افضل گورو کے باقیات کی واپسی کے مطالبہ پر قائم ہے اور وعدہ بند ہے کہ اس معاملہ کی مسلسل پیروی کرے گی ۔ واضح رہے کہ افضل گورو کو 9فروری2013دلی کے تہاڑ جیل میں پھانسی دی گئی۔انجینئر رشید نے اس ضمن میں کشمیر عظمی کو بتایا میں نے آج قانون ساز کونسل میں پی ڈی پی کے حق میں اپنا ووٹ دیا ہے کیونکہ انہوں نے دیر آئد درست آئد کے مصداق افضل سے متعلق میری قرارداد کی حمایت کی اور افضل کے باقیات کی واپسی کا مطالبہ کیا۔ انہوں نے کہا افضل گورو کے معاملے پر میراموقف واضح ہے،مجھے امید ہے کہ وہ اس معاملے کو زور وشور سے آگے بڑھائیں گے۔ یہ بات قابل ذکر ہے کہ حالیہ راجیہ سبھا انتخابات کے دوران انجینئر رشید نے اپنا ووٹ سینئر کانگریس لیڈر غلام نبی آزاد کے حق میں دے دیا جس کی وجہ سے آزاد نے کامیابی حاصل کرلی۔

مزید :

عالمی منظر -