ایران کے 20 بحری جہاز ڈبو دیئے، سینٹکام کا دعویٰ

واشنگٹن (ڈیلی پاکستان آن لائن) امریکی فوج نے دعویٰ کیا ہے کہ اس نے جاری فوجی کارروائیوں کے آغاز سے اب تک ایران کی حکومت سے تعلق رکھنے والے 20 سے زائد بحری جہازوں کو نشانہ بنایا یا ڈبو دیا ہے۔ یہ بیان امریکی سینٹرل کمانڈ   یعنی سینٹکام کی جانب سے جاری کیا گیا۔

سینٹکام کے مطابق گزشتہ شب ہونے والے حملے میں ایک سلیمانی کلاس جنگی جہاز کو بھی نشانہ بنایا گیا، جس کے بعد اسے ان جہازوں کی فہرست میں شامل کر لیا گیا ہے جنہیں امریکی افواج نے تباہ یا ناکارہ بنایا ہے۔ امریکی حکام اس سے قبل بھی یہ دعویٰ کر چکے ہیں کہ انہوں نے بین الاقوامی سمندری حدود میں ایک ایرانی جنگی جہاز کو ڈبو دیا تھا۔

دوسری جانب سری لنکا کی بحریہ کا کہنا ہے کہ اسے سمندر سے کم از کم 87 لاشیں ملی ہیں، تاہم ان لاشوں کی شناخت یا ان کا تعلق کس ملک سے ہے، اس بارے میں تفصیلات فوری طور پر سامنے نہیں آئیں۔

ایران کی طرف سے اس دعوے پر تاحال کوئی باضابطہ ردعمل سامنے نہیں آیا۔