”تصاویر اور ویڈیوز کو مزید دلچسپ بنائیں“ واٹس ایپ نے دلچسپ اور نئے فیچرز متعارف کرا دئیے
لاہور (مانیٹرنگ ڈیسک) مشہور سوشل میڈیا ایپلی کیشن واٹس ایپ کی نئی اپ ڈیٹ میں بہت سے نئے اور دلچسپ فیچرز متعارف کرا دئیے گئے ہیں جن کے تحت اب صارفین اپنی تصاویر اور ویڈیوز پر کچھ لکھنے کے علاوہ ایموجیز اور ڈوڈلز کا اضافہ بھی کر سکتے ہیں۔
واٹس ایپ ایپلی کیشن کی ٹیم نے آفیشل بلاگ پر جاری کئے گئے بیان میں کہا ہے کہ ”جب آپ واٹس ایپ کا استعمال کرتے ہوئے کوئی نئی تصویر یا ویڈیو ریکارڈ کریں گے یا اپنے موبائل میں پہلے سے موجود تصویر یا ویڈیو کو شیئر کرنا چاہیں گے تو خودکار طریقے سے ہی نئے ایڈیٹنگ ٹولز سامنے آ جائیں گے۔“
واٹس ایپ ٹیم کے مطابق ” بھلے ہی آپ کسی کے ساتھ اپنی والہانہ محبت ظاہر کرنے کیلئے کسی تصویر پر بڑا سا دل بنانا چاہتے ہیں یا اپنا پسندیدہ ایموجی شامل کریں، کبھی کبھی ایک تصویر ہزاروں الفاظ سے بہتر ہوتی ہے اس لئے اپنے جذبات کے اظہار کیلئے ٹیکسٹ شامل کریں، اور فونٹ کا رنگ اور سٹائل تبدیل کریں۔“
ان سب آپشنز کے علاوہ واٹس ایپ نے سیلفیز اتارنے کیلئے سکرین کو فلیش کے طور پر استعمال کرنے کی سہولت بھی شامل کی ہے اور ویڈیو ریکارڈ کرنے کیلئے زوم ان فیچر بھی شامل کیا ہے جبکہ اب آپ ڈبل ٹیپ کے ذریعے فوری طور پر پچھلے یا اگلے کیمرہ کو سوئچ بھی کر سکتے ہیں۔ یہ اپ ڈیٹ آئی فون اور اینڈرائڈ صارفین کیلئے متعارف کرا دی گئی ہے اور آپ بھی اپنی ایپلی کیشن کو اپ ڈیٹ کر کے ان فیچرز کو استعمال کر سکتے ہیں۔
