اے بی ڈویلیئرز کے بعد کس سٹار کھلاڑی نے پی ایس ایل سے معاہدہ کر لیا؟ بڑی خوشخبری آ گئی
دبئی (ڈیلی پاکستان آن لائن) پاکستان سپر لیگ (پی ایس ایل) کے چوتھے ایڈیشن میں دنیائے کرکٹ کے بڑے نام اپنا جلوہ دکھائیں گے اور پاکستانیوں کیلئے خوشخبری ہے کہ جنوبی افریقہ کے اے بی ڈویلیئرز کے بعد آسٹریلیا کے سٹیو سمتھ نے بھی معاہدہ کر لیا ہے۔
جنوبی افریقہ کے مایہ ناز بلے باز اے بی ڈویلیئر کے بعد سابق آسٹریلوی کپتان سٹیو سمتھ نے بھی پی ایس ایل 4 کیلئے معاہدہ کر لیا ہے جس کے بعد انہیں پلاٹینم کیٹیگری میں شامل کیا گیا ہے۔پلاٹینئم کیٹیگری میں شامل دیگر کھلاڑیوں میں برینڈن میکولم، اے بی ڈویلیئرز، کرس لین، کولن منرو، لیوک رونچی، ڈوین براوو، سنیل نارائن، کیرون پولارڈ، عمران طاہر، کولن انگرام، مچل میکلنگن، تھیسارا پریرا اور راشد خان شامل ہیں۔
نیوزی لینڈ کے وکٹ کیپر لیوک رونچی کو ڈائمنڈ سے پلاٹینم کیٹگری میں ترقی دے دی گئی ہے اور وہ پی ایس ایل 4 کا بے تابی سے انتظار کر رہے ہیں۔حال ہی میں آئی سی سی رینکنگ میں نمبر ون آل راؤنڈر کا درجہ پانے والے افغانستان کے راشد خان بھی پی ایس ایل کا حصہ ہوں گے جو کوئٹہ گلیڈی ایٹرز کی نمائندگی کر سکتے ہیں۔
لیگ کے تیسرے ایڈیشن میں کوئٹہ گلیڈی ایٹرز کی نمائندگی کرنے والے سری لنکن آل راؤنڈر تھیسارا پریرا بھی پی ایس ایل 4 کا حصہ ہوں گے۔پاکستان کرکٹ بورڈ کے چیئرمین احسان مانی کا کہنا ہے کہ آئندہ چند روز میں پی ایس ایل میں شامل ہونے والے مزید کھلاڑیوں کے ناموں کا اعلان کیا جائے گا۔ یاد رہے کہ پاکستان سپر لیگ کے چوتھے ایڈیشن کا باقاعدہ آغاز 14 فروری 2019 سے ہوگا۔
