سری لنکن ٹیم نے پاکستان میں عالمی کھیلوں کے دروازے کھول دئیے
سری لنکا کی ٹیم کا دورہ پاکستان خوش آئند ہے ایک طویل عرصہ کے بعد شائقین کرکٹ کے چہروں پر جو خوشی عیاں ہوئی ہے اس سے ثابت ہوتا ہے کہ پاکستانی کرکٹ شائقین کی شدید خواہش ہے کہ پاکستان میں بھی کھیلوں کی سر گرمیوں کا سلسلہ جاری رہے پاکستان کرکٹ کے لئے یہ بہت خوش آئند بات ہے سری لنکاکی ٹیم پر ہی حملہ کے بعد پاکستان میں انٹرنیشنل کرکٹ بند ہوگئی تھی مگر اب اس کا آغاز اس بات کی دلیل ہے کہ یہ سلسلہ اب اسی طرح سے جاری رہے گا پاکستان کرکٹ بورڈ کی اس حوالے سے کاوشوں کی جتنی بھی تعریف کی جائے کم ہے اس حوالے سے انہوں نے بہت اقدامات کئے اور اس وقت بھی پاکستان کرکٹ بورڈ دیگر کرکٹ بورڈز سے بھی رابطہ میں ہے
کہ وہ اپنی ٹیموں کو کھیلنے کے لئے پاکستان بھیجیں اور امید ہے کہ جلد ہی اس حوالے سے شائقین کرکٹ کو خوشخبری مل جائے گی اس میں کوئی شک نہیں کہ ہر ٹیم کی پاکستان میں آکر کھیلنا چاہتی ہے اس کی وجہ یہ ہے کہ یہاں پر کھیلوں کے لئے بہت سازگار ماحول ہے اور اب جب سری لنکا کی ٹیم نے یہ قدم اٹھایا ہے تو اب اس کو دیکھتے ہوئے دیگر ٹیمیں بھی پاکستان آکر ضرور کھیلیں گی کراچی میں پاکستان کی ٹیم نے سری لنکا کے خلاف ون ڈے سیریز اپنے نام کی اور ایک طویل عرصہ کے بعد پاکستان کی ٹیم نے ون ڈے سیریز جیتی ہے
کراچی میں جس طرح سے شائقین کرکٹ نے میچز میں دلچسپی لی وہ خوش آئند امر ہے ایک میچ بارش کیوجہ سے نہیں ہوسکا جس سے شائقین کرکٹ میں مایوسی ہوئی مگر اس کے بعد دو میچزمنعقد ہوئے اب لاہور میں ٹی ٹونٹی سیریز کا میلہ سجنے کو ہے جس کے لئے تیاریاں مکمل کرلی گئیں ہیں اور امید ہے کہ جس طرح سے کراچی میں شائقین کرکٹ نے کرکٹ کا میلہ لوٹ لیا اسی طرح سے اب لاہوری بھی اس حوالے سے پیچھے نہیں رہیں گے اور مہمان ٹیم کو بھرپور انداز سے ویلکم کریں گے پاکستان میں اس وقت کرکٹ کے مقابلوں کا انعقاد بہت ضروری ہے کیونکہ ایک طویل عرصہ سے کھیلوں کا انعقاد نہ ہونے کی وجہ سے جو نقصان برداشت کرنا پڑا اس سے پاکستان میں کرکٹ کو بہت دھچکہ لگا ہے
امید ہے کہ پاکستان نے اب جن ٹیموں کے خلاف پاکستان میں ہی شیڈول سیریز کھیلنی ہے اس کا انعقاد پاکستانی سر زمین پر ہی ہوگا اور اس حوالے سے ہمیں سیکورٹی فورسز کا بھی شکرگزار ہونا چاہئیے جنہوں نے اس دورہ کی کامیابی میں اپنا بھرپور کردار ادا کیا اور ان کی دن رات محنت کی وجہ سے ہی یہ ممکن ہوا ہے اور اس سیکورٹی پر جس طرح سے اعتماد کیا گیا یہ ہماری بہت بڑی کامیابی ہے سری لنکا کی ٹیم نے جو قدم اٹھایا ہے اس کی تعریف کی جانی چائیے اور اب دیگر کرکٹ بورڈز بھی اس حوالے سے امیدہے کہ اپنا بھرپور کردار ادا کریں گے اور اس حوالے سے پاکستان کرکٹ بورڈ بھی جن کوششوں میں اس وقت مصروف ہے امید ہے کہ اس کو بھی اس میں کامیابی حاصل ہوگی کیونکہ پاکستانی شائقین کرکٹ کی شدید خواہش ہے کہ پاکستان میں اب مستقل طور پر انٹرنیشنل ٹیموں کی آمد کا سلسلہ شروع ہوجائے تاکہ وہ بھی کرکٹ سے محظوظ ہوسکیں۔
