دلوں میں درد بھرتا آنکھ میں گوہر بناتا ہوں | سلیم احمد |
دلوں میں درد بھرتا آنکھ میں گوہر بناتا ہوں
جنہیں مائیں پہنتی ہیں میں وہ زیور بناتا ہوں
غنیمِ وقت کے حملے کا مجھ کو خوف رہتا ہے
میں کاغذ کے سپاہی کاٹ کر لشکر بناتا ہوں
پرانی کشتیاں ہیں میرے ملاحوں کی قسمت میں
میں ان کے بادباں سیتا ہوں اور لنگر بناتا ہوں
یہ دھرتی میری ماں ہے اس کی عزت مجھ کو پیاری ہے
میں اس کے سر چھپانے کے لیے چادر بناتا ہوں
یہ سوچا ہے کہ اب خانہ بدوشی کر کے دیکھوں گا
کوئی آفت ہی آتی ہے اگر میں گھر بناتا ہوں
مرے خوابوں پہ جب تیرہ شبی یلغار کرتی ہے
میں کرنیں گوندھتا ہوں چاند سے پیکر بناتا ہوں
شاعر: سلیم احمد
(مجموعۂ کلام: چراغِ نیم شب؛سالِ اشاعت،1985 )
Dilon Men Dard Bharta Aankh Men Gohar Banaata Hun
Jinhen Maaen Pahinti Hen Main Wo Zewar Banaata Hun
Ghaneem-e-Waqt K Hamlay Ka Mujh Ko Khaof Rehta Hay
Main Kaaghaz K Sipaahi Kaat Kar Lashkar Banaata Hun
Puraani Kashtiyaan Hen Miray Mallaahon Ki Qismat Men
Main In K Baadbaan Seeta Hun Aor Langar Banaata Hun
Yeh Dharti Meri Maan Hay Iss Ki Izzat Mujh Ko Piyaari Hay
Main Iss Ka Sar Chhupaanay K Liay Chaadar Banaata Hun
Yeh Socha Hay Keh Ab Khaana Badoshi Kar K Dekhun Ga
Koi Aafat Hi Aati Hay Agar Main Ghar Banaata Hun
Miray Khaabon Pe Jab Teera Shabi Yalghaar Karti Hay
Main Kirnen Goondhta Hun Chaand Say Paikar Banaata Hun
Poet: Saleem Ahmad