شاہوں کی غلامی مری فطرت میں نہیں ہے۔۔۔

قُدرت کو بدل دوں مری قُدرت میں نہیں ہے
حکمت میں نہیں اور حکومت میں نہیں ہے 

دریوزہ گری شاہوں کے دربار میں کرنا
شاہوں کی غلامی مری فطرت میں نہیں ہے

اب ذہن کی قندیل کو روشن بھی کرو تم 
یہ برقِ تجلی کوۓ ظلمت میں نہیں ہے 

جو بارِ امانت ملا انساں کو ازل میں 
توہینِ بشر بارِ امانت میں نہیں ہے 

محرومِ تماشا ہے سرِ گلشنِ ہستی 
جو آنکھ یہاں ورطۂ حیرت میں نہیں ہے 

جنت میں ہے کیفیّتِ یکسانیتِ وصل 
یہ ہجر کی لذّت تری جنت میں نہیں ہے 

تدبیر کا قائل ہوں مگر جعفری صاحب 
منزل وہ ملے کیسے جو قسمت میں نہیں ہے 
کلام : ڈاکٹر مقصود جعفری (اسلام آباد)