نجی اراضی سرکار کیلئے ایکوائرکرنے کا کیس ؛پشاور ہائیکورٹ کے فیصلے کیخلاف حکومتی اپیل مسترد

اسلام آباد(ڈیلی پاکستان آن لائن)نجی اراضی سرکار کیلئے ایکوائر کرنے کے کیس میں سپریم کورٹ نے پشاور ہائیکورٹ کے فیصلے کیخلاف حکومتی اپیل مسترد کردی.
نجی ٹی وی چینل دنیا نیوز کے مطابق سپریم کورٹ میں نجی اراضی سرکار کیلئے ایکوائر کرنے کے کیس کی سماعت ہوئی، چیف جسٹس پاکستان کی سربراہی میں بنچ نے کیس کی سماعت کی، دوران سماعت چیف جسٹس قاضی فائز عیسیٰ کا ایڈیشنل اٹارنی جنرل کیساتھ سخت مکالمہ ہوا۔
چیف جسٹس پاکستان نے استفسار کیا کہ عدالتی فیصلے پر کیا عملدرآمد ہوا؟ایڈیشنل اٹارنی جنرل نے کہاکہ فریقین میں سمجھوتہ ہو گیا ،چیف جسٹس پاکستان نے استفسار کیا عملدرآمد رپورٹ کیوں جمع نہیں کرائی؟کیا یہ کوئی ریاستی راز ہے جو عدالت کے سامنے نہیں کھولنا چاہتے؟آپ اپنا کام کیوں نہیں کرتے؟کیا فیصلے میں یہ لکھیں کہ آپ عدالتی سوالات کا جواب دینے کے اہل نہیں؟ ایڈیشنل اٹارنی جنرل نے کہاکہ مجھے اٹارنی جنرل نے کیس میں پیش ہونے کا کہا، چیف جسٹس قاضی فائز عیسیٰ نے کہا کہ عدالت آپ کو جرمانہ کرے گی،ایڈیشنل اٹارنی جنرل نے کہاکہ جرمانہ کر دیں میں ادا کر دوں گا، چیف جسٹس نے کہاکہ جرمانہ آپ کو اپنی جیب سے ادا کرنا ہوگا۔
چیف جسٹس پاکستان نے کہا کہ آپ کی فراخ دلی پر جرمانہ نہیں کررہے،سپریم کورٹ نے ہائیکورٹ فیصلے کیخلاف اپیل مسترد کردی ،سپریم کورٹ نے پشاور ہائیکورٹ کا فیصلہ برقرار رکھا۔
یاد رہے کہ مانسہرہ میں نجی زمین سرکاری کیلئے 15ہزار روپے فی ایکڑ پر حاصل کی گئی تھی،پشاور ہائیکورٹ نے رقم فی ایکڑڈیڑھ لاکھ روپے کردی تھی ۔