پی سی بی کی سالانہ ایوارڈزتقریب 8اگست کو منعقد ہوگی

لاہور(سپورٹس رپورٹر)پاکستان کرکٹ بورڈکی سالانہ ایوارڈز کی تقریب آئندہ کراچی میں منعقد ہو گی جس میں بہترین کارکردگی کا مظاہرہ کرنے والوں کو ایوارڈز سے نوازا جائیگا۔ایوارڈ کی تقریب 8 اگست کو کراچی میں منعقدہ ہو گی جس میں قومی کرکٹرز کے ساتھ ساتھ اعلیٰ حکام بھی شریک ہوں گے۔ایوارڈز میں فخر زمان کو سب سے بڑا فیورٹ قرار دیا جا رہا ہے اور وہ بہترین بلے باز اور پلیئر آف دی ایئر ایوارڈ کے مضبوط ترین امیدوار ہیں۔گزشتہ سال بہترین کھیل پیش کرنے والے حسن علی کو بہترین باؤلر کے ایوارڈ کے لیے مضبوط ترین امیدوار سمجھا جا رہا ہے تاہم سب سے سخت مقابلہ بہترین آل راؤنڈر کیلئے شاداب خان اور فہیم اشرف کے درمیان ہے جہاں دونوں ہی کھلاڑیوں نے گزشتہ سال بہترین کھیل پیش کیا۔ابھرتے ہوئے بہترین کھلاڑی کے ایوارڈ کیلئے چیف سلیکٹر انضمام الحق کے بھتیجے امام الحق مضبوط امیدوار ہیں۔ایوارڈز کی تقریب میں ٹیسٹ، ون ڈے اور ٹی20 میں عمدہ کھیل پیش کرنے والوں کو مختلف کیٹیگریز میں ایوارڈ دیے جائیں گے۔