منحرف حوثی وزیر کی ہزاروں اہم رازوں سے پردہ اٹھانے کی دھمکی 

منحرف حوثی وزیر کی ہزاروں اہم رازوں سے پردہ اٹھانے کی دھمکی 

  

صنعاء(آئی این پی)یمن میں سرگرم ایران نواز حوثی ملیشیا کے ایک منحرف وزیر عبدالسلام جابر نے کہا ہے کہ اس کے پاس حوثی ملیشیا کے ہزاروں اہم راز ہیں اور وہ راز کسی بھی وقت افشا کرسکتے ہیں۔ سماجی رابطوں کی ویب سائیٹ'فیس بک' پرپوسٹ کردہ ایک بیان میں عبدالسلام جابر نے کہا کہ میرے پاس حوثیوں کے میزائلوں کے حوالے سے مستند معلومات ہیں۔ یہ میزائل ایران کی طرف سے انہیں فراہم کیے گئے ہیں۔انہوں نے دھمکی دی کہ آنے والے دنوں میں وہ ایران کی طرف سے حوثیوں کو فراہم کردہ میزائلوں اور دیگر اہم امور سے متعلق ہزاروں دستاویزات منظر عام پرلے آئیں گے۔خیال رہے کہ عبدالسلام جابر نومبر 2018 کو حوثی ملیشیا سے منحرف ہوگئے تھے۔ وہ اس وقت سعودی عرب میں ہیں جہاں وہ ایک پریس کانفرنس میں اپنے منحرف ہونے کا اعلان کرنے کے ساتھ حوثیوں کی پالیسی پر شدید تنقید کرتے رہے ہیں۔ وہ حوثیوں پر یمن کا تشخص تباہ کرنے اور یمنی قوم پر غیر فطری پالیسی مسلط کرنے کا الزم عاید کرتے ہیں۔عدن کے الجلا فوجی کیمپ پرحوثیوں کے حملوں کے بارے میں منحرف وزیر کا کہنا تھا کہ جنوبی یمن کے بارے میں حوثیوں کے عزائم پہلے بھی انتہائی گھٹیا تھے۔انہوں نے لکھا کہ ایران اب بھی حوثیوں کو اسلحہ اور دیگر شعبوں میں مدد فراہم کررہا ہے۔

مزید :

عالمی منظر -