ایف آئی اے نے جہانگیر ترین کی شوگر ملز سمیت تین گروپس کے خلاف کریک ڈاﺅن شروع کر دیا 

ایف آئی اے نے جہانگیر ترین کی شوگر ملز سمیت تین گروپس کے خلاف کریک ڈاﺅن شروع ...
ایف آئی اے نے جہانگیر ترین کی شوگر ملز سمیت تین گروپس کے خلاف کریک ڈاﺅن شروع کر دیا 

  

اسلام آباد(ڈیلی پاکستان آن لائن ) ایف آئی اے نے تین بڑے شوگر مل گروپس کے خلاف کریک ڈاون شروع کردیا ہے ۔

نجی ٹی وی جیونیوز کی رپورٹ کے مطابق اس حوالے سے 20 ارب روپے کے مالی جرم کی تفتیش کیلئے جے ڈی ڈبلیو، آر وائی کے اور العربیہ کو نوٹسز دے دیے گئے۔وفاقی حکومت نے 20 ارب روپے سے زائد کے مبینہ مالی جرم میں ملوث ملک میں شوگر ملز چلانے والے تین بڑے گروپس کے خلاف تحقیقات کیلئے ایک اعلیٰ اختیاراتی مشترکا تحقیقاتی ٹیم تشکیل دی ہے۔

ایف آئی اے کے سربراہ واجد ضیاءکی جانب سے تشکیل دی گئی سی آئی ٹی نے پی ٹی آئی رہنماءجہانگیر ترین کی ملکیت جے ڈی ڈبلیو گروپ آف کمپنیز، آر وائی کے گروپ کی ملکیت الائنس شوگر ملز، جس میں وفاقی وزیر برائے اکنامک افیئرز مخدوم خسرو بختیار کے خاندان کا بڑا حصہ ہے اور پاکستان مسلم لیگ قائد کے رہنماء چوہدری مونس الٰہی کے خلاف قانونی کارروائی کا آغاز کردیا ہے۔

سرکاری دستاویزات میں انکشاف ہوا ہے کہ یہ کارروائی وفاقی کابینہ کے 23 جون کے فیصلے کی روشنی میں سامنے آرہی ہے جو شوگر انکوائری کمیشن کی سفارشات کی روشنی میں سامنے آیا۔ڈائریکٹر ایف آئی اے ڈاکٹر رضوان کی سربراہی میں سی آئی ٹی کو جے ڈی ڈبلیو گروپ کے مبینہ بے نامی کاروبار/ مالی جرم وغیرہ، جس میں 16.1 ارب روپے سے زائد کی رقم شامل ہے، کے خلاف تفتیش شروع کرنے کا اختیار شوگر کمیشن کی سفارشات کی روشنی میں دیا گیا ہے۔

مزید :

قومی -