کے الیکٹرک کے بن قاسم پاور پلانٹ میں خرابی، شہر کو 130 میگا واٹ بجلی کی فراہمی معطل
کراچی(ڈیلی پاکستان آن لائن)کے الیکٹرک کے بن قاسم پاور پلانٹ یونٹ میں تکنیکی خرابی سے سسٹم کو 130 میگاواٹ بجلی کی فراہمی معطل ہو گئی۔
نجی ٹی وی نے ذرائع کے حوالے سے اپنی رپورٹ میں بتایا ہے کہ کراچی میں بجلی کی طلب 2700 میگاواٹ ہے اور کے الیکٹرک اپنے سسٹم سے صرف 900 میگا واٹ بجلی فراہم کر رہی ہے جب کہ نیشنل گرڈ اور آئی پی پیز سے 1020 میگا واٹ بجلی مل رہی ہے،اس طرح کراچی میں بجلی کی طلب اور رسد میں فرق 780 میگاواٹ تک پہنچ گیا ہے۔ذرائع کا کہنا ہے کہ سسٹم میں خرابی سے لیاری، کھارادر، نارتھ و نیوکراچی، بفرزون اور سرجانی میں صبح 9 بجے سے بجلی بند ہے جب کہ فیڈرل بی ایریا، سکیم 33، اورنگی ٹاؤن اور بلدیہ میں بھی بجلی کی آنکھ مچولی جاری ہے۔علاقہ مکینوں کا کہنا ہے کہ لوڈ شیڈنگ سے مستثنی علاقوں میں 3 گھنٹوں کی لوڈشیڈنگ کی جارہی ہے جب کہ دیگر علاقوں میں لوڈشیڈنگ کا دورانیہ دس گھنٹوں تک پہنچ گیا ہے اور رات کے اوقات میں 3 سے 5 گھنٹے بجلی کی لوڈشیڈنگ جاری ہے۔اس کے علاوہ شہر کے مختلف علاقوں میں مقامی فالٹس کے نام پر بجلی بندش کا سلسلہ بھی جاری ہے۔